નવી દિલ્હી તા.૨૬ : 26 જુલાઈ કારગિલ વિજય દિવસ નિમિત્તે આજે આપણે 1999ના તે ઐતિહાસિક દિવસોને યાદ કરી રહ્યા છીએ જ્યારે ભારતના તત્કાલીન વડાપ્રધાન અટલ બિહારી વાજપેયીએ પોતાના દૃઢ અને નિર્ણાયક નેતૃત્વથી સમગ્ર દેશનું મનોબળ વધાર્યું હતું.

કારગિલની બરફીલી ચોટીઓ પર જ્યારે યુદ્ધ ચરમસીમાએ પહોંચ્યું હતું, ત્યારે અટલ બિહારી વાજપેયીએ આંતરાષ્ટ્રીય અને સ્થાનિક મંચ પરથી સ્પષ્ટ શબ્દોમાં ચેતવણી આપી હતી. તેમણે કહ્યું હતું - "પાકિસ્તાન કાલનો સૂરજ નહીં જોઈ શકે". અટલજીના આ એક જ વાક્યથી માત્ર દેશવાસીઓમાં જ નહીં, પરંતુ પાડોશી દેશ પાકિસ્તાનના તત્કાલીન વડાપ્રધાન નવાઝ શરીફના શાસનમાં પણ ખળભળાટ મચી ગયો હતો.

અટલ સરકારે યુદ્ધ દરમિયાન ભારતીય સેનાને સંપૂર્ણ સ્વતંત્રતા અને ખુલ્લી છૂટ આપી હતી. હવાઈ હુમલાથી લઈને જમીની ઓપરેશન સુધી દરેક નિર્ણયમાં સરકારે સેનાની પડખે ઉભા રહેવાનો નિર્ણય કર્યો. આ સાથે જ અટલજીએ વિશ્વ સમક્ષ પાકિસ્તાનની ઘૂસણખોરીને બેનકાબ કરીને ભારતનો પક્ષ મજબૂતીથી રજૂ કર્યો.

અટલજીના આ દૃઢ રાજકીય અને કૂટનીતિક નેતૃત્વના કારણે જ ભારતીય સેનાએ માત્ર 60 દિવસમાં કારગિલની તમામ મહત્વપૂર્ણ ચોટીઓ પરથી ઘૂસણખોરોને ખદેડીને તિરંગો લહેરાવ્યો હતો. આ વિજય માત્ર લશ્કરી સફળતા નહોતો, પરંતુ એક મજબૂત રાજનેતાના નેતૃત્વની જીત પણ હતી.

આજે પણ અટલ બિહારી વાજપેયીનું આ નિવેદન દરેક ભારતીય માટે દેશભક્તિ, સ્વાભિમાન અને દૃઢ ઈચ્છાશક્તિનું પ્રતીક બની ગયું છે. કારગિલ વિજય દિવસે આખો દેશ અટલજી અને તે 527 શહીદોને નમન કરી રહ્યો છે જેમણે દેશની રક્ષા માટે પોતાના પ્રાણોની આહુતિ આપી.