બ્રિટિશ સત્તાવાળાઓ દ્વારા રશિયન તેલના પરિવહન બદલ ભારતીય કેપ્ટન અજય પંતની ધરપકડ કરવામાં આવી છે. આ કેસમાં કાયદાકીય ગૂંચવણો વધતા, ઉત્તરાખંડના નૈનીતાલના વતની એવા પંતના પરિવારે ભારત સરકાર પાસે તેમની સુરક્ષિત મુક્તિ અને વતન વાપસી માટે હસ્તક્ષેપની માંગ કરી છે. 

રશિયાથી ભારત આવી રહેલા એક ઓઈલ ટેન્કર 'MV Smyrtos' પર બ્રિટિશ સશસ્ત્ર દળો અને નેશનલ ક્રાઈમ એજન્સીએ ઈંગ્લિશ ચેનલ નજીક કાર્યવાહી કરી હતી. આ જહાજ પર પ્રતિબંધિત રશિયન ક્રૂડ ઓઈલ હોવાનો આરોપ છે. 31 વર્ષીય કેપ્ટન અજય પંતને આ મામલે કસ્ટડીમાં લેવામાં આવ્યા છે. બ્રિટનના પ્રતિબંધોનું ઉલ્લંઘન કરી રશિયાથી તેલની હેરફેર કરવાનો આરોપ. કાયદાકીય સ્થિતિ: સાઉધમ્પટન મેજિસ્ટ્રેટ કોર્ટમાં કેસની સુનાવણી થઈ છે, હવે આગામી સુનાવણી 16 જુલાઈએ બોનમાઉથ ક્રાઉન કોર્ટમાં નિર્ધારિત છે. આ ગુનામાં મહત્તમ 10 વર્ષ સુધીની જેલની સજા થઈ શકે છે. 

કેપ્ટન અજય પંતના પત્ની રિતુએ જણાવ્યું હતું કે, તેમના પતિ છેલ્લા 15 વર્ષથી શિપિંગ ક્ષેત્રે નિષ્કલંક કારકિર્દી ધરાવે છે. તેમણે કહ્યું કે, "તેઓ માત્ર કંપનીના આદેશોનું પાલન કરતા હતા અને તેમને જહાજમાં શું માલ છે તે અંગે કોઈ વ્યક્તિગત રસ નહોતો." પરિવારે એ વાત પર ભાર મૂક્યો છે કે તેમને આ ધરપકડની જાણકારી સત્તાવાર માધ્યમોને બદલે સોશિયલ મીડિયા દ્વારા મળી હતી.

ઉત્તરાખંડના ગૃહ સચિવ શૈલેષ બગૌલીએ જણાવ્યું કે રાજ્ય સરકારે વિદેશ મંત્રાલયને પત્ર લખીને મદદ માંગી છે. દિલ્હી સ્થિત પ્રાદેશિક કમિશનર કેન્દ્રીય અધિકારીઓ સાથે સતત સંપર્કમાં છે. ભારતીય ઉચ્ચાયોગને પંતને મળવાની 'કોન્સ્યુલર એક્સેસ' મળી ગઈ છે.

જહાજ પર કેમ કાર્યવાહી થઈ? આ ટેન્કર રશિયાના 'શેડો ફ્લીટ'નો ભાગ માનવામાં આવે છે, જે યુક્રેન યુદ્ધને આર્થિક ટેકો આપે છે. જહાજની સ્થિતિ: ટેન્કરે કેમરૂનનું રજિસ્ટ્રેશન ગુમાવ્યા બાદ તે 'ફ્લેગલેસ' કોઈ દેશના ધ્વજ વગરનું બની ગયું હતું. હાલમાં તે વેમાઉથ પાસે લંગરિત છે અને તેની સુરક્ષા તથા પર્યાવરણીય જોખમો પર નજર રાખવામાં આવી રહી છે.