વારાણસી :  ધાર્મિક અને સાંસ્કૃતિક નગરી વારાણસીમાં ગંગા નદીએ ફરી એકવાર પોતાનું રૌદ્ર સ્વરૂપ ધારણ કરતાં સમગ્ર ઘાટ વિસ્તારમાં ભારે અફરાતફરીનો માહોલ સર્જાયો છે. માત્ર 24 કલાકના ટૂંકા ગાળામાં જ ગંગા નદીના જળસ્તરમાં 6 ફૂટ જેટલો જંગી વધારો નોંધાયો છે, જેના પરિણામે શહેરના 40 થી વધુ ઐતિહાસિક ઘાટ સંપૂર્ણપણે પૂરના પાણીમાં ગરકાવ થઈ ગયા છે. પરિસ્થિતિની ગંભીરતાને ધ્યાનમાં રાખીને જળ પોલીસ અને રાષ્ટ્રીય આપત્તિ પ્રતિભાવ દળ (NDRF) ની ટીમોને હાઈ એલર્ટ પર મૂકવામાં આવી છે, જ્યારે સુરક્ષાના પગલે નદીમાં નાની-મોટી તમામ પ્રકારની બોટના સંચાલન પર તાત્કાલિક અસરથી રોક લગાવી દેવામાં આવી છે.

કેન્દ્રીય જળ આયોગના આંકડા મુજબ ગંગાનું જળસ્તર પ્રતિ કલાક 6 સેન્ટીમીટરના ભયજનક દરે વધીને 64.70 મીટર સુધી પહોંચી ગયું છે. જોકે, હાલમાં પાણીનું સ્તર ભયજનક સપાટીથી 5 મીટર નીચે છે, પરંતુ જો આ જ ઝડપે પાણી વધતું રહેશે તો આગામી બે થી ત્રણ દિવસમાં જ ચેતવણીનું સ્તર વટાવી જવાની ભીતિ સેવાઈ રહી છે. જળસ્તરમાં થયેલા આ અચાનક વધારાને કારણે વિશ્વપ્રસિદ્ધ દશાશ્વમેઘ ઘાટ પર યોજાતી દિવ્ય ગંગા આરતીનું સ્થાન સતત ત્રીજી વખત બદલવાની ફરજ પડી છે. જો પાણી ઘાટના પગથિયાં વટાવી જશે તો આગામી દિવસોમાં આરતી છત પર યોજવી પડશે અને ભક્તોની સંખ્યા પણ મર્યાદિત કરવી પડશે.

આ કુદરતી આફતની સૌથી મોટી અને સીધી અસર સ્થાનિક પૂજારીઓ, વેપારીઓ અને નાવિકોની આજીવિકા પર પડી છે. બોટિંગ પર સંપૂર્ણ પ્રતિબંધ મુકાતા જ સેંકડો નાવિક પરિવારની રોજગારી ઠપ્પ થઈ ગઈ છે, જેનાથી તેમના જીવનનિર્વાહ પર સંકટ ઊભું થયું છે. ઘાટો પર દરરોજ યોજાતી પૂજાવિધિઓ અને ધાર્મિક ક્રિયાકાંડો પણ પૂરમાં ધોવાઈ ગયા છે. હાલમાં સ્થાનિક વહીવટીતંત્ર અને જળ પોલીસ ચોવીસે કલાક ગંગાની સપાટી પર ઝીણવટભરી નજર રાખી રહ્યા છે અને જળસ્તર ઘટ્યા બાદ જ બોટિંગ સેવાઓ પુનઃ શરૂ કરવા અંગે નિર્ણય લેવામાં આવશે.