નવી દિલ્હી : ભારતની અતિથિ દેવો ભવઃ ની પરંપરા અને હૂંફાળું સ્વાગત હંમેશાં વિદેશી પ્રવાસીઓ માટે આશ્ચર્ય અને આકર્ષણનું કેન્દ્ર રહ્યું છે, તાજેતરમાં સોશિયલ મીડિયા પર વાયરલ થયેલા એક અનોખા વીડિયોમાં મોરોક્કોથી ભારત ફરવા આવેલા યાહ્યા ખદ્દીર નામના યુવા પ્રવાસીએ કોઈ આમંત્રણ વગર જ એક ભારતીય લગ્નમાં શાહી અંદાજમાં એન્ટ્રી કરીને ધમાકો મચાવી દીધો છે.

પ્રાપ્ત વિગતો અનુસાર, ભારતીય સંસ્કૃતિથી પ્રભાવિત થઈને રોયલ શેરવાની અને માથે સુંદર પાઘડી પહેરીને ઈ-રિક્ષામાં મુસાફરી કરી રહેલા આ વિદેશી મહેમાનની નજર રસ્તામાં રંગબેરંગી રોશનીથી સજ્જ એક લગ્ન મંડપ પર પડી હતી, અને લગ્નનો માહોલ તથા ડીજેના ધમાકેદાર અવાજથી આકર્ષાઈને તેણે કોઈપણ પૂર્વ પરિચય કે આમંત્રણ વગર જ સીધા જાનમાં પ્રવેશ કર્યો હતો.

લગ્નમાં અચાનક પહોંચેલા આ અજાણ્યા વિદેશી યુવકને જોઈને સવાલો કરવાના બદલે ત્યાંના પરિવારે અને મહેમાનોએ તેને ઉત્સાહથી આવકાર્યો હતો, જ્યાં એક વ્યક્તિએ તેનો હાથ પકડીને ખુશીથી ડાન્સ કરતા-કરતા તેને અંદર સ્વાગતપૂર્વક દોરી ગયો હતો અને જોતજોતામાં તે લગ્નના જશ્નનો મુખ્ય હિસ્સો બની ગયો હતો.

આ ભવ્ય ઉજવણી દરમિયાન વિદેશી પ્રવાસીએ લગ્નમાં ઉપસ્થિત મહિલાઓ અને મહેમાનો સાથે ઢોલના તાલે મન મૂકીને ઠુમકા લગાવ્યા હતા, સ્ટેજ પર પહોંચીને વર-કન્યાને શુભકામનાઓ પાઠવી હતી અને ભારતીય સંસ્કૃતિના રંગમાં રંગાઈને પૂરા જોશ સાથે 'ભારત માતા કી જય'ના નારા પણ લગાવ્યા હતા.

આ યાદગાર અનુભવનો વીડિયો સોશિયલ મીડિયા પર શેર કરતાં તેણે જણાવ્યું હતું કે ભારત દેશ તેને દરેક વખતે નવી અને સુખદ સરપ્રાઈઝ આપે છે, જ્યારે બીજી તરફ સોશિયલ મીડિયા યૂઝર્સ દ્વારા ભારતીય મહેમાનગતિ અને આ ખુશનુમા માહોલની મુક્તકંઠે પ્રશંસા કરવામાં આવી રહી છે.

આ ઘટનાએ સાબિત કરી દીધું છે કે ભારતીય સંસ્કૃતિમાં અતિથિઓને અપનાવવાની જે ભાવના છે, તે કોઈપણ ભાષા કે સીમાઓની મોહતાજ નથી હોતી અને આવા કિસ્સાઓ કાયમ માટે યાદગાર બની જતા હોય છે.