નવી દિલ્‍હી તા.૧૦: દેશમાં રૂા.૨૦૦૦ ની નોટ બંધ થયાને ત્રણ વર્ષથી વધુ સમય વીતી ગયો છે, છતાં લોકો હજુ પણ મોટી માત્રામાં આ નોટો ધરાવે છે. રિઝર્વ બેંક ઓફ ઈન્‍ડિયા (RBI) એ તેના તાજેતરના અપડેટમાં જણાવ્‍યું છે કે ૩૦ એપ્રિલ, ૨૦૨૬ સુધીમાં ચલણમાંથી પાછી ખેંચી લીધા પછી પણ, જનતા પાસે હજુ પણ રૂા. ૫,૪૫૧ કરોડની નોટો છે. ૯૮.૪૭% નોટો બેંકિગ સિસ્‍ટમમાં પાછી આવી ગઈ છે, પરંતુ લગભગ ૧.૫% ચલણમાં છે. રિઝર્વ બેંક ઓફ ઈન્‍ડિયા (RBI) એ તેના સત્તાવાર ખાતામાંથી એક પોસ્‍ટમાં આ માહિતી શેર કરી હતી.

૧૯ મે, ૨૦૨૩ ના રોજ, RBI એ રૂા.૨૦૦૦ ની નોટો ચલણમાંથી પાછી ખેંચવાની જાહેરાત કરી હતી. તે સમયે, રૂા.૩.૫૬ લાખ કરોડની રૂા.૨૦૦૦ ની નોટો ચલણમાં હતી. ૩૦ એપ્રિલ, ૨૦૨૬ સુધીમાં, ફક્‍ત રૂા. ૫,૪૫૧ કરોડની નોટો ચલણમાં રહી છે.

જો તમારી પાસે હજુ પણ રૂા.૨૦૦૦ ની નોટો છે, તો ચિતા કરવાની કોઈ જરૂર નથી. રૂા.૨,૦૦૦ ની નોટો અંગે, રિઝર્વ બેંક ઓફ ઈન્‍ડિયા (RBI) એ તેના નવીનતમ સ્‍ટેટસમાં જણાવ્‍યું છે કે આ ગુલાબી રૂા. ૨,૦૦૦ ની નોટો સંપૂર્ણપણે કાયદેસર ટેન્‍ડર રહેશે.

આ નોટો જમા કરાવવા અથવા બદલવાની સુવિધા ૭ ઓક્‍ટોબર, ૨૦૨૩ સુધી બધી બેંક શાખાઓમાં ઉપલબ્‍ધ હતી. જો કે, આ સુવિધા હજુ પણ રિઝર્વ બેંકની ૧૯ ઈશ્‍યુ ઓફિસોમાં ઉપલબ્‍ધ છે. વધુમાં, જનતા દેશના કોઈપણ પોસ્‍ટ ઓફિસથી પોસ્‍ટ દ્વારા રૂા.૨,૦૦૦ ની નોટો કોઈપણ RBI ઈશ્‍યુ ઓફિસમાં તેમના બેંક ખાતામાં જમા કરાવવા માટે મોકલી શકે છે.