વોશિંગ્ટન: રાષ્ટ્રીય સ્વયંસેવક સંઘ (RSS) ના મહાસચિવ દત્તાત્રેય હોસાબલે અત્યારે બ્રિટન અને અમેરિકાના પ્રવાસે છે, જ્યાં તેમણે સંઘ વિશે પ્રવર્તી રહેલી દાયકાઓ જૂની ગેરમાન્યતાઓને દૂર કરવા માટે કમર કસી છે. વોશિંગ્ટનમાં આયોજિત એક કાર્યક્રમમાં હોસાબલેએ સ્પષ્ટપણે જણાવ્યું હતું કે, RSS ને જે રીતે 'હિન્દુ સર્વોપરી', 'લઘુમતી વિરોધી' કે 'મહિલા વિરોધી' તરીકે ચિતરવામાં આવે છે, તે વાસ્તવમાં એક વિકૃત પ્રચારનો ભાગ છે. તેમણે ભારપૂર્વક કહ્યું કે, સંઘ સર્વસમાવેશી છે અને તેના વિશે પશ્ચિમી દેશોમાં ફેલાયેલી ભ્રમણાઓ હવે દૂર કરવાનો સમય પાકી ગયો છે.

હોસાબલેએ જણાવ્યું કે, સંઘ અત્યાર સુધી "અમારું કાર્ય જ અમારો સંદેશ છે" ના મંત્ર સાથે શાંતિથી કામ કરતું હતું, પરંતુ હવે વૈશ્વિક સ્તરે સીધો સંપર્ક સાધવો જરૂરી બન્યો છે. ખાસ કરીને સંઘના ૧૦૦ વર્ષ પૂર્ણ થવા જઈ રહ્યા છે ત્યારે, ભારત અને હિન્દુ સંસ્કૃતિ વિશેની જે કથા દાયકાઓથી મરોડીને રજૂ કરવામાં આવી છે, તેને સુધારવી એ સંઘની પ્રાથમિકતા છે. તેમણે ઉમેર્યું કે, સંઘ પૃષ્ઠભૂમિના ન હોય તેવા લોકો પણ હવે ભારતની સાચી ઓળખ રજૂ કરવાના અભિયાનમાં જોડાયા છે.

વિદેશી ભારતીયો માટે ખાસ સંદેશ:

અમેરિકામાં સ્થાયી થયેલા ભારતીય પ્રવાસીઓને સંબોધતા હોસાબલેએ એક મહત્વનો સંદેશ આપ્યો હતો. તેમણે કહ્યું કે, "તમે જે દેશમાં આજીવિકા કમાઓ છો, તે દેશ પ્રત્યે તમારે સંપૂર્ણ વફાદાર રહેવું જોઈએ." તેમણે ભારતીયોને આહ્વાન કર્યું કે તેઓ જે-તે દેશના આદર્શ નાગરિક બને અને સખત મહેનત દ્વારા સાબિત કરી આપે કે હિન્દુ સમાજ નેતૃત્વ, સમાજ સેવા અને અર્થતંત્રના દરેક ક્ષેત્રમાં અર્થપૂર્ણ યોગદાન આપવા માટે સક્ષમ છે.

ગેરસમજો દૂર કરવાનું અભિયાન:

બ્રિટનની મુલાકાત બાદ અમેરિકા પહોંચેલા હોસાબલેએ ત્યાંના શિક્ષણવિદો, નીતિ વિષયક નિષ્ણાતો અને વિચારકો સાથે બેઠકો કરી હતી. આ સંપર્ક અભિયાનનો મુખ્ય ઉદ્દેશ્ય સંઘની છબી વિશે જે ૧૦૦ વર્ષ જૂની રૂઢિચુસ્ત માન્યતાઓ પશ્ચિમી દેશોના મનમાં ઘર કરી ગઈ છે તેને બદલવાનો છે. હોસાબલેએ વિશ્વાસ વ્યક્ત કર્યો કે, જ્યારે લોકો સંઘના વાસ્તવિક મૂલ્યો અને તેના કાર્યોને સીધી રીતે સમજશે, ત્યારે વિરોધીઓ દ્વારા કરવામાં આવતો નકારાત્મક પ્રચાર આપોઆપ નિષ્ફળ સાબિત થશે. સંઘના આ આંતરરાષ્ટ્રીય પ્રવાસે વૈશ્વિક ફલક પર હિન્દુત્વ અને ભારતની છબી અંગે નવી ચર્ચા છેડી દીધી છે.