નવી દિલ્હી : પોસ્ટ ઓફિસના ગ્રાહકો માટે એટીએમમાંથી નાણાં ઉપાડવા અને બચત ખાતાના સંચાલનને લઈને મહત્વપૂર્ણ નિયમો સામે આવ્યા છે, જેમાં હવે પોસ્ટ ઓફિસ એટીએમમાંથી દરરોજ મહત્તમ ₹૨૫,૦૦૦ સુધીની રકમ ઉપાડી શકાશે, પરંતુ એક સમયે વધુમાં વધુ ₹૧૦,૦૦૦ જ ઉપાડી શકાશે. આ સાથે જ પૈસા ઉપાડતી વખતે ખાતામાં ઓછામાં ઓછું ₹૫૦0 બેલેન્સ રાખવું અનિવાર્ય છે, અન્યથા વ્યવહાર રદ થવાની સાથે ₹૨૩ સુધીનો વધારાનો ચાર્જ પણ લાગી શકે છે, જેની માહિતી ટપાલ વિભાગ દ્વારા સ્પષ્ટ કરવામાં આવી છે.

ટપાલ વિભાગ દ્વારા પોતાના અને અન્ય બેંકોના એટીએમ ઉપયોગ માટે અલગ અલગ મફત મર્યાદા નક્કી કરાઈ છે, જેમાં પોસ્ટ ઓફિસ એટીએમ પર દર મહિને ૫ વખત મફતમાં (પૈસા ઉપાડવા, બેલેન્સ તપાસવા કે મીની સ્ટેટમેન્ટ મેળવવા) ઉપયોગ કરી શકાશે, જ્યારે અન્ય બેંકોના એટીએમ માટે ૬ મેટ્રો શહેરોમાં દર મહિને માત્ર ૩ મફત વ્યવહારો અને નોન-મેટ્રો શહેરો તથા નગરોમાં ૫ મફત વ્યવહારોની છૂટ આપવામાં આવી છે. આ નિર્ધારિત મફત મર્યાદા પૂર્ણ થયા પછી જો અન્ય બેંકના એટીએમથી રોકડ ઉપાડવામાં આવે તો ₹૨૩ + GST અને બેલેન્સ કે મીની સ્ટેટમેન્ટ માટે ₹૧૧ + GST તેમજ પોસ્ટ ઓફિસના પોતાના એટીએમ માટે રોકડ ઉપાડ પર ₹૧૦ + GST અને નોન-નાણાકીય વ્યવહાર પર ₹૫ + GST નો ચાર્જ વસૂલવામાં આવશે.

વધુમાં, પોસ્ટ ઓફિસ બચત ખાતામાં જમા થતી રકમ પર વાર્ષિક ૪% વ્યાજ મળે છે, જેની ગણતરી દર મહિનાની ૧૦મી તારીખથી મહિનાના છેલ્લા દિવસ વચ્ચેના સૌથી ઓછા બેલેન્સ પર થાય છે, અને જો ૩૧ માર્ચે ખાતામાં લઘુત્તમ ₹૫૦૦ નું બેલેન્સ ન રહે તો ટપાલ વિભાગ દ્વારા ₹૫૦ નો જાળવણી દંડ કાપવામાં આવે છે. આ વધારાના ચાર્જો અને દંડથી બચવા માટે ગ્રાહકોએ ખાતામાં હંમેશાં ₹૫૦૦ થી વધુ બેલેન્સ જાળવી રાખવું, એટીએમ મફત મર્યાદાનું ધ્યાન રાખવું અને મહિનાની ૧૦ તારીખ પહેલાં નાણાં જમા કરાવવા જેવા સરળ પગલાં અપનાવવા હિતાવહ છે.

આગામી સમયમાં ટપાલ વિભાગ દ્વારા ગ્રાહકોને ડિજિટલ બેંકિંગ સેવાઓ વધુ સરળ બનાવવા અને એટીએમ વ્યવહારોમાં પારદર્શિતા લાવવા માટે વધુ જાગૃતિ અભિયાન ચલાવવામાં આવશે, જેથી ખાતાધારકો અણધાર્યા ચાર્જ અને દંડથી બચી શકે તેમજ બચત યોજનાઓનો મહત્તમ આર્થિક લાભ મેળવી શકે.