News of Friday, 20th November 2026
અમેરિકી ડોલર સામે રૂપિયો ૯૨.૮૨ પર પહોંચ્યો: સાત મહિનાથી વધુ સમય બાદ ૯૩ ની સપાટી તોડી
વિદેશી રોકાણના પ્રવાહ અને શેરબજારની રિકવરીથી રૂપિયામાં ૫૦ પૈસાનો ઉછાળો, ડોલર ઇન્ડેક્સમાં નરમાઈ, ક્રૂડ ઓઇલના ભાવ પર ચિંતા.

મુંબઈ, તા.૨૦: સ્થાનિક શેરબજારોમાં મજબૂત રિકવરી અને વિદેશી રોકાણના સતત પ્રવાહને પગલે શુક્રવારે અમેરિકી ડોલર સામે રૂપિયામાં ૫૦ પૈસાનો ઉછાળો આવ્યો હતો અને રૂપિયો ૯૨.૮૨ ના સ્તરે પહોંચીને સાત મહિનાથી વધુ સમયમાં પ્રથમ વખત ૯૩ ની સપાટી તોડી ગયો હતો.
ઇન્ટરબેંક ફોરેન એક્સચેન્જ માર્કેટમાં રૂપિયો ૯૩.૨૫ પર ખુલ્યા બાદ તેમાં સુધારો નોંધાયો હતો, જ્યારે ૧૩ નવેમ્બરના ૯૪.૧૯ ના બંધ ભાવની સરખામણીમાં તેમાં ૧.૩૭ રૂપિયા અથવા લગભગ ૧.૫ ટકાનો વધારો થયો છે.
અહેવાલો મુજબ, છેલ્લા બે અઠવાડિયામાં વિદેશી પોર્ટફોલિયો રોકાણકારોએ ભારતીય શેરબજારોમાં ૮૪,૦૦૦ કરોડ રૂપિયાથી વધુનું રોકાણ કર્યું છે, જ્યારે ગુરુવારે વિદેશી સંસ્થાકીય રોકાણકારોએ ૭,૪૧૧.૪૧ કરોડ રૂપિયાના શેર ખરીદ્યા હતા.
ફોરેક્સ વિશ્લેષકોના જણાવ્યા અનુસાર, અમેરિકા, તાઈવાન અને દક્ષિણ કોરિયામાં AI સંબંધિત શેરોની તેજી ધીમી પડતાં વિદેશી રોકાણ ભારત તરફ વળ્યું છે, તેમજ ડોલર ઇન્ડેક્સ ૦.૧૫ ટકા ઘટીને ૧૦૩.૬૮ પર આવતા રૂપિયાને ટેકો મળ્યો છે, જ્યારે બપોરના કારોબારમાં સેન્સેક્સ ૮૩,૭૪૪.૭૬ અને નિફ્ટી ૨૫,૭૩૨.૪૦ પર ટ્રેડ થઈ રહ્યા હતા.
બીજી તરફ, બ્રેન્ટ ક્રૂડ ઓઇલના ભાવ ૦.૬૮ ટકા વધીને ૯૨.૬૧ યુએસ ડોલર પ્રતિ બેરલ થયા છે, જેનાથી તેલ આયાતકારોની ડોલર માંગ વધવાની અને રૂપિયા પર દબાણ આવવાની શક્યતા વ્યક્ત કરવામાં આવી છે.
હવે વિદેશી રોકાણના પ્રવાહની સાતત્યતા, ક્રૂડ ઓઇલના ભાવની હિલચાલ અને ફોરેક્સ બજારમાં રૂપિયાના આગામી સ્તર પર સૌની નજર રહેશે.
(4:59 PM IST)









છેલ્લા 8 દિવસમાં સૌથી લોકપ્રિય 
