વૈશ્વિક જીયોપોલિટિક્સમાં ભારતનું કદ સતત વધી રહ્યું છે, ત્યારે રશિયાના રાષ્ટ્રપતિ વ્લાદિમીર પુતિન આગામી સપ્ટેમ્બર મહિનામાં ભારતની મુલાકાતે આવવાના છે. ક્રેમલિન દ્વારા સત્તાવાર રીતે પુષ્ટિ કરવામાં આવી છે કે નવી દિલ્હીમાં યોજાનારી હાઈ-પ્રોફાઇલ 'બ્રિક્સ સમિટ'માં પુતિન હાજરી આપશે. ભારત ચોથી વખત આ પ્રતિષ્ઠિત સમિટની યજમાની કરી રહ્યું છે, જે દક્ષિણ એશિયામાં ભારતના મજબૂત નેતૃત્વનો પુરાવો છે.

ભારત અને રશિયા વચ્ચેના ગાઢ સંબંધોનો અંદાજ એ વાત પરથી લગાવી શકાય છે કે ડિસેમ્બર 2025માં ભારત આવ્યા બાદ, વ્લાદિમીર પુતિન એક વર્ષના ટૂંકા ગાળામાં બીજી વખત ભારતની મુલાકાતે આવી રહ્યા છે. 12 અને 13 સપ્ટેમ્બર 2026 ના રોજ નવી દિલ્હીમાં યોજાનારી આ બેઠક માત્ર રશિયા માટે જ નહીં, પરંતુ તમામ બ્રિક્સ દેશો માટે અત્યંત મહત્વની ગણાઈ રહી છે. ક્રેમલિનના પ્રવક્તા દિમિત્રી પેસ્કોવે આ મુલાકાતની સત્તાવાર જાહેરાત કરીને વૈશ્વિક અટકળો પર વિરામ મૂક્યો છે.

આ મુલાકાત દરમિયાન ભારત અને રશિયા વચ્ચે અનેક મહત્વના દ્વિપક્ષીય કરારો પર હસ્તાક્ષર થઈ શકે છે. ખાસ કરીને:

ઉર્જા ક્ષેત્ર: રશિયા પાસેથી ક્રૂડ ઓઈલની આયાત અને લાંબા ગાળાના એનર્જી પાર્ટનરશીપ પર ચર્ચા.

સંરક્ષણ સોદા: અત્યાધુનિક સંરક્ષણ પ્રણાલીઓ અને ટેકનોલોજી ટ્રાન્સફર અંગે નવા કરારો.

વૈશ્વિક સુરક્ષા: આતંકવાદ વિરોધી અભિયાન અને આર્થિક સહયોગ વધારવા પર ભાર.

સપ્ટેમ્બરમાં યોજાનારી મુખ્ય સમિટ પહેલા, મે 2026 માં બ્રિક્સ દેશોના વિદેશ મંત્રીઓની એક મહત્વપૂર્ણ બેઠક દિલ્હીમાં યોજાશે. આ બેઠકમાં સમિટનો એજન્ડા નક્કી કરવામાં આવશે અને સપ્ટેમ્બરમાં થનારા સંભવિત કરારોની બ્લુપ્રિન્ટ તૈયાર કરવામાં આવશે. રશિયા, ચીન, બ્રાઝિલ, દક્ષિણ આફ્રિકા અને નવા જોડાયેલા સભ્ય દેશોના પ્રતિનિધિઓની હાજરીને કારણે દિલ્હી અત્યારથી જ રાજદ્વારી ગતિવિધિઓનું કેન્દ્ર બની ગયું છે.