મોસ્કો:  રશિયા અને યુક્રેન વચ્ચે ચાલી રહેલું ભીષણ યુદ્ધ હવે જમીનની સાથે સાથે દરિયામાં પણ અત્યંત ભયાનક અને રોમાંચક મોડ લઈ ચૂક્યું છે. કાળા સમુદ્રના રણમેદાનમાં રશિયન લશ્કરે આક્રમક વલણ અપનાવીને યુક્રેનના ચોર્નોમોર્સ્ક બંદર નજીક તૈનાત ચાર જેટલા જંગી કાર્ગો જહાજો પર પોતાના કિલર 'ગેરાન' ડ્રોનથી આત્મઘાતી હુમલા કરી દીધા છે. રશિયન સંરક્ષણ મંત્રાલયે દાવા સાથે જણાવ્યું કે આ બલ્ક કેરિયર્સ અને ફેરીનો ઉપયોગ યુક્રેનિયન સેના માટે પશ્ચિમી દેશોમાંથી ઘાતક શસ્ત્રો અને લશ્કરી સાધન-સામગ્રી લાવવા માટે કરવામાં આવી રહ્યો હતો, જેથી આ કાર્યવાહી સંપૂર્ણપણે કાયદેસર છે.

બીજી તરફ, આ ડ્રોન હુમલાને પગલે સમગ્ર આંતરરાષ્ટ્રીય સમુદાયમાં તીવ્ર રોષ અને ચિંતાની લહેર ફરી વળી છે. યુક્રેનિયન સત્તાવાળા અને ઓડેસાના પ્રાદેશિક વડા ઓલેગ કિપરે રશિયાના દાવોનો સખત વિરોધ કરતા ખુલાસો કર્યો છે કે તાંઝાનિયાનો ઝંડો ધરાવતા એક સંપૂર્ણપણે નાગરિક વેપારી જહાજ પર રશિયન ડ્રોને નિશાન સાધ્યું હતું. આ ભયાનક ધમાકામાં જહાજના કેપ્ટને સ્થળ પર જ જીવ ગુમાવ્યો છે, જ્યારે ક્રૂના ત્રણ સભ્યો ગંભીર રીતે ઘાયલ થયા છે. યુક્રેને આ ઘટનાને નિર્દોષ નાગરિક શિપિંગ અને આંતરરાષ્ટ્રીય માનવતાવાદી કાયદાઓ પરનો ખુલ્લો આતંક ગણાવીને વિશ્વ શક્તિઓ પાસે તાત્કાલિક કડક પગલાં લેવાની માંગ કરી છે.

કાળા સમુદ્રમાં વધતી જતી આ હિંસક ટક્કરના કારણે વૈશ્વિક વેપાર માર્ગો અને અનાજ પુરવઠા પર કાળી વિપદાના વાદળો ઘેરાયા છે. તુર્કી સહિતના અનેક મધ્યસ્થ દેશો કાળા સમુદ્રમાં નાગરિક જહાજો પર થતા હુમલાઓને રોકવા માટે શાંતિ સમજૂતી કરાવવા રાત-દિવસ મથી રહ્યા છે, પરંતુ બંને દેશો વચ્ચેની આ હઠધર્મીતા સમવાનું નામ નથી લઈ રહી. રશિયા તેને લશ્કરી લોજિસ્ટિક્સ પરનો ચોક્કસ પ્રહાર ગણાવે છે, તો યુક્રેન તેને વૈશ્વિક આર્થિક ઘેરાબંધી ગણાવી રહ્યું છે. આ ભયાનક દરિયાઈ જંગે હવે યુદ્ધને એક નવા અને અત્યંત ખતરનાક તબક્કામાં ધકેલી દીધું છે.