ગુવાહાટી: તા.૦૬ પૂર્વોત્તર ભારતના પ્રવેશદ્વાર ગણાતા આસામમાં ભાજપની ભવ્ય જીત બાદ હવે નવી સરકારની રચનાની ઘડીઓ ગણાઈ રહી છે. મુખ્યમંત્રી હિમંત બિસ્વા સરમાએ આજે રાજ્યપાલ લક્ષ્મણ પ્રસાદ આચાર્યને પોતાનું રાજીનામું સોંપ્યું છે. જોકે, નવી સરકારની રચના ન થાય ત્યાં સુધી તેઓ કાર્યવાહક મુખ્યમંત્રી તરીકે જવાબદારી સંભાળશે. આગામી ૧૨ મેના રોજ આસામમાં નવી સરકારનો શપથ ગ્રહણ સમારોહ યોજાશે, જેમાં વડાપ્રધાન નરેન્દ્ર મોદી સહિત ભાજપના અનેક દિગ્ગજ નેતાઓ હાજરી આપશે.
શું હિમંત બિસ્વા સરમા મારશે હેટ્રિક?
આસામના રાજકારણમાં અત્યારે સૌથી મોટો પ્રશ્ન એ છે કે મુખ્યમંત્રી કોણ બનશે? સૂત્રોના જણાવ્યા અનુસાર, હિમંત બિસ્વા સરમા સતત ત્રીજી વખત મુખ્યમંત્રી પદના શપથ લે તેવી પ્રબળ શક્યતા છે. તેમની છબી એક કડક અને વિકાસવાદી નેતા તરીકેની છે. ખાસ કરીને બાંગ્લાદેશી ઘૂસણખોરો અને હિન્દુત્વના મુદ્દાઓ પર તેમના આક્રમક વલણને કારણે તેઓ જનતામાં લોકપ્રિય છે. જોકે, ભાજપે અગાઉ રાજસ્થાન અને મધ્યપ્રદેશમાં નવા ચહેરાઓ લાવીને સૌને ચોંકાવ્યા હતા, તેથી સત્તાવાર જાહેરાત માટે ધારાસભ્ય દળની બેઠકની રાહ જોવામાં આવી રહી છે.
વિકાસની ગંગા વહેતી રાખવાનો સંકલ્પ
રાજ્યપાલને મળ્યા બાદ હિમંત બિસ્વા સરમાએ જનતાનો આભાર માનતા કહ્યું કે, "આસામના લોકોએ અમારી સરકાર પર અપાર વિશ્વાસ મૂક્યો છે. જનતા ઈચ્છે છે કે રાજ્યમાં જે વિકાસની ગંગા વહી રહી છે તે અવિરત ચાલુ રહે." તેમણે સ્પષ્ટ કર્યું કે કેન્દ્રીય નિરીક્ષકોની હાજરીમાં મળનારી ધારાસભ્ય દળની બેઠકમાં જ નવા નેતાની પસંદગી કરવામાં આવશે.
બંગાળમાં પણ તૈયારીઓ તેજ
બીજી તરફ, પશ્ચિમ બંગાળમાં પણ ૯ મેના રોજ શપથ ગ્રહણ સમારોહ યોજાવા જઈ રહ્યો છે. બંગાળમાં મુખ્યમંત્રી પદ માટે શુભેન્દુ અધિકારી રેસમાં સૌથી આગળ છે, પરંતુ દિલીપ ઘોષ, રૂપ ગાંગુલી અને અગ્નિમિત્રા પોલ જેવા નામોની પણ ચર્ચા થઈ રહી છે. આમ, મે મહિનામાં પૂર્વી ભારત અને ઉત્તર-પૂર્વ ભારતમાં ભાજપના વિજય ઉત્સવ સાથે નવી સરકારોના શપથ ગ્રહણનો દોર જોવા મળશે.