મુંબઈ, તા.20: આલ્બેનિયામાં ચાલી રહેલા સરકારવિરોધી હિંસક પ્રદર્શનો અને સુપ્રીમ કોર્ટને આગ ચાંપવાની ઘટનાને લઈને શિવસેના (યુબીટી)ના અંદરખાને જ વૈચારિક મતભેદો સપાટી પર આવ્યા છે. પક્ષના સાંસદ સંજય રાઉતે આલ્બેનિયાની હિંસક ઘટનાઓમાંથી ભારતે પણ બોધપાઠ લેવો જોઈએ તેવું નિવેદન આપ્યા બાદ, પક્ષનાં જ પ્રમુખ નેતા અને સાંસદ પ્રિયંકા ચતુર્વેદીએ ખુલ્લેઆમ તેનો વિરોધ કર્યો છે. તેમણે સ્પષ્ટ શબ્દોમાં જણાવ્યું છે કે ભારત એક વિશાળ અને મજબૂત લોકશાહી દેશ છે, જેને અન્ય નાના દેશોની હિંસક ક્રાંતિમાંથી શીખવાની કોઈ આવશ્યકતા નથી.

આ વિવાદની શરૂઆત ત્યારે થઈ જ્યારે સંજય રાઉતે સોશિયલ મીડિયા પ્લેટફોર્મ એક્સ પર આલ્બેનિયાના પ્રદર્શનોનો ઉલ્લેખ કરતા પોસ્ટ કરી હતી. તેમાં દાવો કરવામાં આવ્યો હતો કે આલ્બેનિયામાં ભ્રષ્ટ સરકાર અને સુપ્રીમ કોર્ટ સામે રોષે ભરાયેલા પ્રદર્શનકારીઓએ સંસદભવન, સરકારી કાર્યાલયો અને સર્વોચ્ચ અદાલતને આગ ચાંપી દીધી છે. આ ઘટનાઓનો હવાલો આપીને રાઉતે સૂચન કર્યું હતું કે ભારત સહિતના દેશોએ આમાંથી બોધપાઠ લેવો જોઈએ, જેણે રાજકીય ગરમાવો લાવી દીધો હતો.

સંજય રાઉતના આ નિવેદન સામે તીખી પ્રતિક્રિયા આપતા પ્રિયંકા ચતુર્વેદીએ જણાવ્યું હતું કે આલ્બેનિયા એક નાનો દેશ છે જ્યાં લાંબો સમય સરમુખત્યારશાહી રહી છે. કાયદો હાથમાં લેવો, વ્યવસ્થાને અસ્થિર કરવી અને સુપ્રીમ કોર્ટ કે સંસદ જેવી પવિત્ર બંધારણીય સંસ્થાઓ પર હુમલા કરવા ક્યારેય યોગ્ય હોઈ શકે નહીં. લોકશાહીમાં હિંસા દ્વારા સત્તા પરિવર્તન કરવાના વિચારોને ક્યારેય સમર્થન આપી શકાય નહીં, કારણ કે આવા માર્ગો દેશ માટે ઘાતક સાબિત થઈ શકે છે.

આ ઉપરાંત, પ્રિયંકા ચતુર્વેદીએ બાંગ્લાદેશમાં થયેલા વિરોધ પ્રદર્શનોનું ઉદાહરણ ટાંકીને હિંસક સત્તા પરિવર્તનને યોગ્ય ઠેરવવાની માનસિકતા સામે પણ આકરો રોષ વ્યક્ત કર્યો હતો. તેમણે જણાવ્યું હતું કે બાંગ્લાદેશમાં શરૂઆતમાં વિદ્યાર્થી આંદોલન તરીકે શરૂ થયેલા વિરોધ બાદ કટ્ટરપંથી તત્વોએ તેનો કબજો લીધો હતો અને હિન્દુઓ સહિતના લઘુમતીઓ પર ક્રૂર હુમલાઓ થયા હતા. આવા અરાજકતાવાદી બનાવોમાંથી પ્રેરણા લેવી અથવા તેને ભારતમાં લાગુ કરવાની વાત કરવી અત્યંત દુર્ભાગ્યપૂર્ણ છે.

ભારતીય લોકશાહીની મજબૂતાઈ પર ભાર મૂકતા તેમણે યાદ અપાવ્યું કે ભૂતકાળમાં દેશમાં કટોકટી જેવી કાળી રાતો પણ આવી ચૂકી છે, પરંતુ ભારતીય જનતાએ હંમેશાં બંદૂકની તાકાતે નહીં પરંતુ માત્ર 'મતદાન પેટી' (ચૂંટણી) ના માધ્યમથી જ સત્તા પરિવર્તન કરીને લોકશાહીની તાકાત દુનિયાને બતાવી છે. પેરિસ કે આલ્બેનિયાની હિંસક ઘટનાઓને ભારત માટે માર્ગદર્શક માનવી તે આપણા બંધારણીય મૂલ્યોની વિરુદ્ધ છે.

પક્ષના જ બે દિગ્ગજ નેતાઓ દ્વારા જાહેરમાં સામસામે નિવેદનો આપવાને કારણે રાજકીય વર્તુળોમાં ભારે ચર્ચાઓ શરૂ થઈ ગઈ છે. એક તરફ જ્યાં વિપક્ષી નેતાઓ સરકાર સામે આક્રમક વલણ અપનાવી રહ્યા છે, તો બીજી તરફ શિવસેના (યુબીટી)ની અંદર જ લોકશાહી અને હિંસાના મુદ્દે વૈચારિક મતભેદો બહાર આવતા આગામી દિવસોમાં આ મામલો વધુ રાજકીય વળાંક લે તેવી પૂરી સંભાવના છે.