મુંબઈ : મરાઠા અનામત આંદોલનના અગ્રણી નેતા મનોજ જરાંગે પાટીલને રૂ. ૫૦૦ કરોડની તોતિંગ રકમ ચૂકવવામાં આવી હોવાના દાવા સાથે વાયરલ થયેલી એક ઓડિયો ક્લિપે મહારાષ્ટ્રના રાજકારણમાં ભૂકંપ સર્જ્યો છે. આ વિવાદ વચ્ચે ભારતીય જનતા પાર્ટી (BJP) દ્વારા શિવસેના (ઉદ્ધવ બાળાસાહેબ ઠાકરે) પક્ષના સાંસદ સંજય રાઉત વિરુદ્ધ અત્યંત ગંભીર આક્ષેપો કરવામાં આવ્યા છે. ભાજપે દાવો કર્યો છે કે આ સમગ્ર ઓડિયો ક્લિપ આર્ટિફિશિયલ ઇન્ટેલિજન્સ (AI) ની મદદથી બનાવટી રીતે તૈયાર કરવામાં આવી છે અને તેનો મુખ્ય હેતુ ભાજપ, નાયબ મુખ્ય પ્રધાન એકનાથ શિંદે તથા મનોજ જરાંગે વચ્ચે ભ્રમણા અને મતભેદ ઊભા કરવાનો છે.

પત્રકાર પરિષદને સંબોધિત કરતા ભાજપના મુખ્ય પ્રવક્તા નવનાથ બને આક્ષેપ કર્યો હતો કે નવી મુંબઈના વાશી વિસ્તારમાં આવેલા એક કથિત ‘વોર રૂમ’ માંથી સંજય રાઉત દ્વારા આ કાવતરું રચવામાં આવ્યું છે. તેમના જણાવ્યા અનુસાર, છેલ્લા બે મહિનાથી આ એઆઈ જનરેટેડ ઓડિયો ક્લિપને પરફેક્ટ બનાવવાની કામગીરી ચાલી રહી હતી, જેમાં યુટ્યુબ પર ઉપલબ્ધ અવાજના સેમ્પલનો ઉપયોગ કરવામાં આવ્યો હતો. આ વાયરલ ક્લિપની સ્ક્રિપ્ટ 'સામના' અખબારની ઓફિસમાં તૈયાર થઈ હોવાનો દાવો કરતા તેમણે કહ્યું કે શરૂઆતમાં રૂ. ૧૦0 કરોડનો આંકડો વિચારવામાં આવ્યો હતો, પરંતુ મીડિયાનું વધુ ધ્યાન ખેંચવા માટે તેને વધારીને રૂ. ૫૦૦ કરોડ કરવામાં આવ્યો હતો.

આ વિવાદની શરૂઆત ત્યારે થઈ હતી જ્યારે મનોજ જરાંગેએ ગુરુવારે જાલનામાં એક પત્રકાર પરિષદ દરમિયાન આ વાયરલ ઓડિયો ક્લિપ સાર્વજનિક કરી હતી. જરાંગેએ આક્ષેપ કર્યો હતો કે તેમને ચૂપ કરવા અને મરાઠા આંદોલનને નબળું પાડવા માટે આ મોટું ષડયંત્ર રચવામાં આવ્યું છે. અગાઉ, નાયબ મુખ્ય પ્રધાન એકનાથ શિંદેએ ભાજપ પાસેથી નાણાં મેળવ્યા હોવાના અને તે રકમ પોતાના પુત્ર સાંસદ શ્રીકાંત શિંદે મારફતે જરાંગે સુધી પહોંચાડી હોવાના આક્ષેપો સામે પડકાર ફેંક્યા બાદ આ રેકોર્ડિંગ બહાર આવ્યું હતું. આ વાયરલ ક્લિપમાં એક મહિલા કથિત રીતે રૂ. ૫૦૦ કરોડની ચૂકવણી અને ૨૦૨૪ની ચૂંટણી પહેલાં મરાઠવાડામાં જરાંગેના પ્રભાવને ડામવાની ચર્ચા કરતી સાંભળવા મળે છે.

આ ગંભીર રાજકીય ઘમાસાણને પગલે મુખ્ય પ્રધાન દેવેન્દ્ર ફડણવીસે શુક્રવારે જ આ વિવાદાસ્પદ ઓડિયો ક્લિપની ફોરેન્સિક તપાસ કરાવવાના આદેશ આપી દીધા છે, જ્યારે ખુદ મનોજ જરાંગે દ્વારા પણ આ મામલે નિષ્પક્ષ સ્પેશિયલ ઇન્વેસ્ટિગેશન ટીમ (SIT) દ્વારા તપાસની માંગ કરવામાં આવી છે. બીજી તરફ, શિવસેનાના અન્ય નેતા રામદાસ કદમે પણ ભાજપના જ કેટલાક આંતરિક લોકો આ કાવતરામાં સામેલ હોવાના આક્ષેપો કરીને સ્થિતિને વધુ રોચક બનાવી દીધી છે. ભાજપે હવે માંગ કરી છે કે સંજય રાઉતની આ સમગ્ર પ્રકરણમાં ભૂમિકાની ઊંડાણપૂર્વક તપાસ થવી જોઈએ કે તેમને આ માટે કોઈ નાણાકીય સહાય મળી હતી કે કેમ.

આગામી સમયમાં ફોરેન્સિક અને પોલીસ તપાસના અહેવાલો સામે આવ્યા બાદ જ સ્પષ્ટ થશે કે આ ઓડિયો ક્લિપ કેટલી સાચી છે અને તેના પાછળ વાસ્તવિક માસ્ટરમાઇન્ડ કોણ છે. મહારાષ્ટ્રની રાજનીતિમાં આગામી સ્થાનિક અને વિધાનસભાની ચુંટણીઓ પૂર્વે આ વિવાદે એક નવો જ તડકો ઉમેરી દીધો છે, જેના કારણે તમામ રાજકીય પક્ષો વચ્ચે શાબ્દિક યુદ્ધ પરાકાષ્ઠાએ પહોંચ્યું છે.