પાલઘર : પાલઘર જિલ્લાના રમણીય કળંબ બીચ પર આવેલા એક રિસોર્ટમાં ચાલી રહેલી પાર્ટી દરમિયાન ઉત્સાહ અને રોષમાં ભાન ભૂલેલા એક સરપંચના પતિ દ્વારા હવામાં ગોળીબાર કરવામાં આવ્યાની ચોંકાવનારી ઘટના સામે આવી છે. બિલ્ડિંગ મટીરિયલ સપ્લાયર એવા આ આરોપીએ મધ્યરાત્રિના સુમારે ખુલ્લેઆમ ફાયરિંગ કરી નાખ્યું હતું, જોકે પોલીસની સમયસૂચકતાને કારણે આરોપી તાત્કાલિક પકડાઈ ગયો હતો.

રાત્રે દોઢ વાગ્યે ગુંજ્યો ગોળીબારનો અવાજ

અર્નાળા સાગરી પોલીસના જણાવ્યા અનુસાર, પકડાયેલા આરોપીની ઓળખ સંદેશ ગુરવ (ઉંમર ૩૨ વર્ષ) તરીકે થઈ છે, જે ભિવંડી વિસ્તારની એક મહિલા સરપંચનો પતિ છે. મંગળવારની મધરાતે દોઢ વાગ્યાની આસપાસ જ્યારે રિસોર્ટમાં પાર્ટી પૂરજોશમાં ચાલી રહી હતી, ત્યારે અતિશય ઉત્સાહમાં આવીને સંદેશ ગુરવે પોતાની પિસ્તોલમાંથી હવામાં એક રાઉન્ડ ફાયરિંગ કર્યું હતું.

પોલીસ પહોંચતા જ રિસોર્ટ સંચાલકોએ કરી છુપાવવાની કોશિશ

સદભાગ્યે, તે જ સમયે રિસોર્ટ નજીક પેટ્રોલિંગ કરી રહેલા પોલીસ બીટ માર્શલે ગોળીબારનો ભડાકો સાંભળ્યો હતો. તેઓ તુરંત જ રિસોર્ટ પર દોડી ગયા અને ત્યાં હાજર લોકો તથા મેનેજમેન્ટને પૂછપરછ કરી. પરંતુ શરૂઆતમાં રિસોર્ટના સંચાલકો અને ત્યાં હાજર લોકોએ આવી કોઈ પણ ઘટના બની હોવાનો ઇનકાર કરીને મામલો દબાવવાનો પ્રયાસ કર્યો હતો.

ખાલી કારતૂસ મળતા ખૂલી ગયું રહસ્ય

બીટ માર્શલને શંકા જતાં તેમણે તરત જ વરિષ્ઠ પોલીસ અધિકારીઓને આ બાબતની જાણ કરી હતી. વરિષ્ઠ અધિકારીઓ કાફલા સાથે તાત્કાલિક રિસોર્ટ પહોંચ્યા અને સઘન તપાસ શરૂ કરી હતી. તપાસ દરમિયાન રિસોર્ટના કમ્પાઉન્ડમાંથી ફાયર કરાયેલી એક ખાલી કારતૂસ મળી આવી હતી. પોલીસની આકરી પૂછપરછ સામે આરોપી વધુ સમય ટકી શક્યો નહીં અને તેણે પાર્ટીના જોશમાં હવામાં ફાયર કર્યાની કબૂલાત કરી લીધી હતી.

અર્નાળા સાગરી પોલીસે ગુનો નોંધીને સંદેશ ગુરવની ધરપકડ કરી લીધી છે અને તેની પાસેથી ખાલી કારતૂસ જપ્ત કરી છે. આ ફાયરિંગમાં વપરાયેલી પિસ્તોલ લાયસન્સવાળી હતી કે કેમ અને તેની પાછળનો વાસ્તવિક હેતુ શું હતો, તે અંગે પોલીસ હાલ ઊંડાણપૂર્વક તપાસ ચલાવી રહી છે.