નવી દિલ્હીઃ દિલ્હી યુનિવર્સિટીના દક્ષિણ કેમ્પસ નજીક સત્ય નિકેતનમાં વિદ્યાર્થીઓને રહેવા અપાયેલી પાંચ માળની ખાનગી ઇમારત ધરાશાયી થતાં સાત લોકોનાં મૃત્યુ બાદ વિદ્યાર્થી સંગઠનો રસ્તા પર ઊતર્યાં છે. અલગ-અલગ સંગઠનોએ દક્ષિણ કેમ્પસ અને મહાનગરપાલિકા કચેરી બહાર દેખાવો યોજીને દુર્ઘટના માટે જવાબદારી નક્કી કરવાની માગ કરી હતી.

કેટલાક દેખાવોમાં મુખ્યમંત્રી રેખા ગુપ્તા અને મહાનગરપાલિકા કમિશનરના રાજીનામાની માગ કરવામાં આવી હતી, જ્યારે અન્ય સંગઠનોએ જવાબદાર અધિકારીઓ, ઇમારતના માલિક અને સંચાલકો સામે કડક કાર્યવાહી કરવા રજૂઆત કરી હતી.

બચાવદળોએ કાટમાળમાંથી ઓછામાં ઓછા ૧૨ લોકોને બહાર કાઢ્યા હતા. પ્રાથમિક તપાસમાં જૂની ઇમારતના ભોંયરામાં પાણી ભરાવું અને ત્યાં ચાલી રહેલું સમારકામ કે ખોદકામ દુર્ઘટનાનું સંભવિત કારણ હોવાનું સામે આવ્યું છે. જોકે દુર્ઘટનાનું ચોક્કસ કારણ તકનિકી તપાસ પૂર્ણ થયા બાદ નક્કી થશે.

તંત્રે ઇમારતના માલિક પરિવારના ત્રણ સભ્યોની ધરપકડ કરી છે. મહાનગરપાલિકાના દક્ષિણ ઝોનના નાયબ કમિશનર સહિત પાંચ અધિકારીઓને સસ્પેન્ડ કરવામાં આવ્યા છે. દિલ્હીનાં મહેમાનગૃહો અને વિદ્યાર્થી આવાસોનું માળખાકીય પરીક્ષણ કરાવવાની પ્રક્રિયા પણ હાથ ધરવામાં આવી છે. ગેરકાયદે અને અસુરક્ષિત બાંધકામો સામે દેશવ્યાપી માર્ગદર્શિકા ઘડવાની દિશામાં પણ વિચારણા શરૂ થઈ છે.