ચેન્નાઈ :  મદ્રાસ હાઈકોર્ટે કોકરોચ જનતા પાર્ટીના રાષ્ટ્રીય સહ-કન્વીનર અને પ્રવક્તા સૌરવ દાસ ઉર્ફે યોગેશ શર્માની નાગરિકતા, પૃષ્ઠભૂમિ અને ઓળખ અંગે થયેલા ગંભીર આરોપો પર કેન્દ્ર સરકાર, ગૃહ મંત્રાલય, પ્રાદેશિક પાસપોર્ટ અધિકારી અને અન્ય ૧૦ પક્ષકારોને નોટિસ જારી કરી છે. મુખ્ય ન્યાયાધીશ એસ.એ. ધર્માધિકારી અને ન્યાયાધીશ જી. અરુલ મુરુગનની પ્રથમ બેન્ચે આ મામલે તમામ સંબંધિત સત્તાધીશોને છ અઠવાડિયામાં પોતાનો સત્તાવાર જવાબ રજૂ કરવા નિર્દેશ આપ્યો છે.

કાંચીપુરમ જિલ્લાના ઉદ્યોગપતિ ગણેશ કુમાર દ્વારા દાખલ કરાયેલી જાહેર હિતની અરજી (PIL)માં દાવો કરવામાં આવ્યો છે કે સૌરવ દાસના મૂળ નેપાળી હોઈ શકે છે. અરજદારનો આરોપ છે કે તેમણે જાણીજોઈને પોતાની વાસ્તવિક પૃષ્ઠભૂમિ છુપાવીને છેતરપિંડીથી ભારતીય આધાર કાર્ડ, મતદાર ઓળખપત્ર અને પાસપોર્ટ મેળવ્યા છે. જો આ તપાસમાં દાસ કે તેમના માતાપિતાના વિદેશી મૂળ સાબિત થાય, તો તેમના તમામ સરકારી ઓળખપત્રો તાત્કાલિક રદ કરવા માંગ કરવામાં આવી છે.

અરજીમાં આ સિવાય વિદેશી ફંડિંગના સ્ત્રોતોની તપાસ અને ભારતીય ન્યાયતંત્ર પર થઈ રહેલી ટિપ્પણીઓ સામે સખત રોક લગાવવાની માંગ પણ કરાઈ છે. ઇલેક્ટ્રોનિક્સ અને આઇટી મંત્રાલયને સૌરવ દાસના X (ટ્વિટર) અને ઇન્સ્ટાગ્રામ હેન્ડલ્સને બ્લોક કરવાનો નિર્દેશ આપવા વિનંતી કરાઈ છે. અરજદારે કોર્ટમાં રજૂઆત કરી હતી કે દાસ અભિવ્યક્તિની સ્વતંત્રતાના નામે દેશની અદાલતો અને સુપ્રીમ કોર્ટના ન્યાયાધીશો સામે અપમાનજનક અને ધમકીભર્યા નિવેદનો આપી રહ્યા છે, જે બંધારણનું અનાદર છે.