બોર્ડેક્સ : ફ્રાન્સના સુંદર દરિયા કિનારે સફર કરી રહેલા ૧,૭૦૦ થી વધુ પ્રવાસીઓ માટે વેકેશન અત્યારે દુઃસ્વપ્ન બની ગયું છે. બોર્ડેક્સ બંદર પર ઉભેલા 'એમ્બિશન' નામના ભવ્ય ક્રુઝ શિપ પર એક ૯૦ વર્ષીય વૃદ્ધ મુસાફરનું શંકાસ્પદ નોરોવાયરસથી મૃત્યુ થયા બાદ ખળભળાટ મચી ગયો છે. ફ્રેન્ચ અધિકારીઓએ સાવચેતીના ભાગરૂપે આખું જહાજ સીલ કરી દીધું છે અને તમામ મુસાફરો તેમજ ક્રૂ સભ્યોને જહાજની અંદર જ રહેવાનો આદેશ આપ્યો છે.

અત્યંત ચેપી વાયરસ અને બીમારીના લક્ષણો

આ ક્રુઝ ૬ મેના રોજ શેટલેન્ડ ટાપુઓથી રવાના થયું હતું, જેમાં મોટાભાગે બ્રિટિશ અને આઇરિશ પ્રવાસીઓ સવાર છે. જહાજ પર અચાનક ૫૦ જેટલા લોકોએ ઝાડા અને ઉલટીના લક્ષણો દર્શાવવાનું શરૂ કર્યું હતું. તબીબોના જણાવ્યા અનુસાર, નોરોવાયરસ એ પેટનો અત્યંત ચેપી વાયરસ છે જે ખૂબ જ ઝડપથી ફેલાય છે. એક પ્રવાસીના મોત બાદ ભયનો માહોલ છે અને બીમાર લોકોની સંખ્યા વધવાની આશંકાએ તંત્રને હરકતમાં લાવી દીધું છે.

વાયરસનો બેવડો ફટકો

ચિંતાજનક વાત એ છે કે, થોડા દિવસો પહેલા જ 'એમવી હોન્ડિયસ' નામના અન્ય એક ક્રુઝ પર 'હંટાવાયરસ'ના પ્રકોપમાં ત્રણ લોકોએ જીવ ગુમાવ્યા હતા. હજુ એ ઘટનાની યાદ તાજી છે ત્યાં જ હવે આ બીજા જહાજ પર નવા વાયરસનો હુમલો થયો છે. હંટાવાયરસથી સંક્રમિત એક ફ્રેન્ચ મહિલાની હાલત અત્યંત ગંભીર છે અને તેને કૃત્રિમ ફેફસાં (લાઈફ સપોર્ટ) પર રાખવામાં આવી છે. વિશ્વ આરોગ્ય સંગઠન (WHO) ના ચીફ ટેડ્રોસ અધાનોમ ઘેબ્રેયેસસે પણ આ સ્થિતિ પર ચિંતા વ્યક્ત કરી છે.

આગામી દિવસોમાં વધી શકે છે કેસ

નિષ્ણાતોનું માનવું છે કે વાયરસનો ઇન્ક્યુબેશન સમયગાળો લાંબો હોવાથી આગામી અઠવાડિયામાં વધુ કેસ સામે આવી શકે છે. હાલમાં બોર્ડેક્સ હાર્બર પર એમ્બિશન ક્રુઝ શિપના ડેક પર ઉભેલા મુસાફરોની તસવીરો સોશિયલ મીડિયા પર વાયરલ થઈ રહી છે, જેમાં તેઓ લાચારીથી બહારની દુનિયા જોઈ રહ્યા છે. ફ્રાન્સના આરોગ્ય અધિકારીઓ સતત જહાજની અંદર રહેલા લોકોના સંપર્કમાં છે અને આ રોગચાળાને ફેલાતો અટકાવવા માટે તમામ પ્રયાસો કરી રહ્યા છે.