નવી દિલ્હી | તા.31: મૂડી બજાર નિયમનકાર સેબી (SEBI) એ શિસ્ત ભંગ અને રોકાણકારો સાથે છેતરપિંડી કરવાના કેસમાં કલાહૃધન ટ્રેન્ડ્ઝ લિમિટેડ (KTL) અને તેના પ્રમોટર્સ વિરુદ્ધ ઐતિહાસિક અને કડક આદેશ જારી કર્યો છે. તપાસમાં બહાર આવ્યું છે કે કંપનીએ એચડીએફસી બેંકના ક્રેડિટ કાર્ડ લેણાંની ચુકવણીમાં થયેલા લોન ડિફોલ્ટને છુપાવ્યું હતું અને લિસ્ટિંગ નિયમોનું ખુલ્લેઆમ ઉલ્લંઘન કર્યું હતું. આ ગંભીર બેદરકારી બદલ સેબીએ કંપની અને તેના મુખ્ય પદાધિકારીઓ પર કુલ રૂપિયા 1 કરોડનો દંડ ફટકારવાની સાથે સિક્યોરિટીઝ માર્કેટમાંથી પ્રતિબંધિત પણ કર્યા છે.

સેબીના 57 પાનાના આ અંતિમ આદેશ અનુસાર, કંપની અને તેના પ્રમોટર તથા મેનેજિંગ ડિરેક્ટર નિરંજન ડી અગ્રવાલને બે વર્ષ માટે જ્યારે અન્ય ડિરેક્ટર્સ આદિત્ય એન અગ્રવાલ અને સુનિતાદેવી નિરંજન અગ્રવાલને એક વર્ષ માટે સિક્યોરિટીઝ બજારમાંથી પ્રતિબંધિત કરવામાં આવ્યા છે. નિયમનકારે નોંધ્યું હતું કે કંપનીએ માત્ર લોન ડિફોલ્ટની માહિતી છુપાવી ન હતી, પરંતુ બાંગ્લાદેશી કંપની સાથે કરોડો રૂપિયાના નિકાસ ઓર્ડરના ભ્રામક દાવાઓ કરીને શેરબજારમાં કૃત્રિમ રીતે શેરના ભાવ અને વોલ્યુમ વધાર્યા હતા, જેના કારણે સામાન્ય રોકાણકારો ખોટા વિશ્વાસમાં ફસાઈ ગયા હતા.

સેબીની કડક ચેતવણી: સેબીના પૂર્ણ-સમયના સભ્ય અમરજીત સિંહે પોતાના આદેશમાં સ્પષ્ટ કર્યું છે કે સાચી અને પારદર્શક માહિતીનું જાહેરાતકરણ વાજબી સિક્યોરિટીઝ બજારનો પાયો છે. નિયમોનું ઉલ્લંઘન કરનારાઓ સામે ભવિષ્યમાં પણ આ જ પ્રકારે કડક પગલાં લેવામાં આવશે.

આ ઉપરાંત, સેબીએ નેશનલ સ્ટોક એક્સચેન્જ (NSE) ને પણ નિર્દેશ આપ્યો છે કે નિયમોનું પાલન ન કરનાર આ એન્ટિટી સામે યોગ્ય કાર્યવાહી કરવામાં આવે, જેમાં જરૂર પડ્યે ફરજિયાત ડિલિસ્ટિંગની પ્રક્રિયા શરૂ કરવાનો પણ સમાવેશ થાય છે.