મુંબઈ, તા.૨૧: મુંબઈમાં ચાલી રહેલા ગણેશોત્સવ દરમિયાન 'લાલબાગચા રાજા', ગણેશગલી અને ચિંચપોકલી જેવા સુપ્રસિદ્ધ મંડળોમાં બાપ્પાના દર્શન કરવા માટે દરરોજ લાખોની સંખ્યામાં ભાવિક ભક્તોનું મહેરામણ ઉમટી રહ્યું છે. મોટાભાગના ઘરગથ્થુ ગણપતિના વિસર્જન બાદ હવે અનંત ચતુર્દશી સુધી સાર્વજનિક મંડળોમાં ભીડ ચરમસીમાએ પહોંચી છે. પરંતુ આ ભારે ઉત્સાહ અને ભક્તિભાવ વચ્ચે લાલબાગ-પરેલ વિસ્તારમાં શ્રદ્ધાળુઓની સુરક્ષા સામે ગંભીર સવાલો ખડા થયા છે. સાંકડા રસ્તાઓ પર મંજૂરી વગર ધમધમતા પ્રમોશનલ સ્ટોલ્સ, ગેરકાયદે દબાણો અને ખુલ્લા લટકતા વીજ વાયરોને કારણે જીવલેણ અકસ્માતો સર્જાઈ રહ્યા છે, જેનાથી ભક્તો અને સ્થાનિકોમાં ભારે રોષ વ્યાપી ગયો છે.

તાજેતરમાં જ કાલાચૌકી મહાગણપતિ મંડળના મુખ્ય પ્રવેશદ્વાર પાસે જોખમી રીતે લટકતા ઈલેક્ટ્રિક વાયરના સંપર્કમાં આવવાથી ૮ વર્ષની માસૂમ બાળકી રાગિણી યાદવ અને એક મહિલાનું કરંટ લાગવાથી કમકમાટીભર્યું મોત નીપજ્યું હતું. આ સિવાય ૧૭મી સપ્ટેમ્બરના રોજ લાલબાગચા રાજાના મુખદર્શનની લાંબી લાઈનમાં કલાકો સુધી ઊભેલા ૨૫ વર્ષીય યુવાન જયદીપ મેઘરાજ નેમાડેનું અચાનક મોત થતાં સનસનાટી મચી ગઈ હતી. કલાકો સુધી ભૂખ્યા-તરસ્યા લાઈનમાં ઊભા રહેતા ભક્તો માટે કતાર વ્યવસ્થાપન અને તાત્કાલિક તબીબી સહાયતાનો ઘોર અભાવ હોવાના ગંભીર આક્ષેપો થઈ રહ્યા છે. સ્થાનિકો સવાલ ઉઠાવી રહ્યા છે કે શું માત્ર સ્ટોલ ધારક સામે કેસ નોંધીને પ્રશાસન પોતાની જવાબદારીમાંથી છટકી શકે?

અઢી કિમીના વિસ્તારમાં અનેક પ્રખ્યાત મંડળો, ટ્રાફિક અને ભીડ અનિયંત્રિત

લાલબાગ અને પરેલ વિસ્તારમાં માત્ર એક થી અઢી કિલોમીટરના અંતરમાં જ લાલબાગચા રાજા, મુંબઈચા રાજા, ચિંચપોકલીચા ચિંતામણી, તેજુકાયા અને પરેલચા રાજા જેવા અત્યંત પ્રતિષ્ઠિત ગણેશ મંડળો આવેલા છે. તમામ મંડળો નજીકમાં જ હોવાથી મુંબઈ અને રાજ્યભરમાંથી આવતા શ્રદ્ધાળુઓ એક જ ફેરામાં તમામ બાપ્પાના દર્શન કરવાનો પ્રયાસ કરે છે, જેના કારણે કરી રોડ, ચિંચપોકલી અને ભારતમાતા સિનેમા સર્કલ સુધીના તમામ માર્ગો પર પગ મૂકવાની જગ્યા નથી બચી અને ટ્રાફિક વ્યવસ્થા સંપૂર્ણપણે ખોરવાઈ ગઈ છે. અનંત ચતુર્દશી સુધી ભીડ હજુ બમણી થવાની શક્યતા હોવાથી વીજ જોડાણોનું કડક ઓડિટ કરવા અને ગેરકાયદે સ્ટોલ્સ તાત્કાલિક હટાવવા માટે તંત્ર પર ભારે દબાણ ઊભું થયું છે.