ન્યૂયોર્ક: સંયુક્ત રાષ્ટ્ર (UN) ખાતે યોજાયેલા બીજા 'ઇન્ટરનેશનલ માઇગ્રેશન રિવ્યુ ફોરમ' (IMRF) માં ભારત વતી વિદેશ રાજ્ય મંત્રી કીર્તિ વર્ધન સિંહે પ્રવાસી ભારતીયોની સુરક્ષા અને અધિકારો અંગે મહત્વનું નિવેદન આપ્યું છે. તેમણે જણાવ્યું કે ભારતે અત્યાર સુધીમાં ૨૩ દેશો સાથે કુલ ૨૭ જેટલા સ્થળાંતર અને ગતિશીલતા (Migration and Mobility) કરારો કર્યા છે, અને આ ભાગીદારીને હજુ વધુ વિસ્તૃત કરવામાં આવશે જેથી ભારતીય નાગરિકોને વિદેશમાં સુરક્ષિત વાતાવરણ મળી રહે.
વર્કર્સના કલ્યાણ માટે ડિજિટલ ક્રાંતિ
મંત્રીએ ભારપૂર્વક જણાવ્યું કે, ભારત માટે આંતરરાષ્ટ્રીય સ્તરે કૌશલ્ય વિકાસ (Skill Development) એ સ્થળાંતર શાસનનો પાયાનો પથ્થર છે. 'સ્કિલ ઇન્ડિયા ઇન્ટરનેશનલ સેન્ટર્સ' અને વિવિધ ડિજિટલ પ્લેટફોર્મ્સ આપણી વર્કફોર્સને વૈશ્વિક ધોરણો સાથે જોડે છે. 'eMigrate' સિસ્ટમ, 'નેશનલ કરિયર સર્વિસ પોર્ટલ' અને 'સ્કિલ ઇન્ડિયા ડિજિટલ હબ' જેવી ડિજિટલ જાહેર માળખાગત સુવિધાઓએ ભરતી પ્રક્રિયામાં પારદર્શકતા લાવીને કામદારોના રક્ષણમાં પરિવર્તનકારી ભૂમિકા ભજવી છે.
મદદ માટે 'મદદ' પોર્ટલ અને કલ્યાણ ભંડોળ
વિદેશમાં વસતા ભારતીયોની સમસ્યાઓના નિરાકરણ માટે મંત્રીએ 'MADAD' પોર્ટલ અને 'ઇન્ડિયન કોમ્યુનિટી વેલ્ફેર ફંડ' જેવી પહેલોનો ઉલ્લેખ કર્યો હતો. 'MADAD' પોર્ટલ દ્વારા કોઈપણ ભારતીય પોતાની રોજગારી કે અન્ય સમસ્યાઓ અંગે સીધી ઓનલાઈન ફરિયાદ કરી શકે છે અને તેની પ્રગતિ પર નજર રાખી શકે છે. આ ઉપરાંત, ભારતીય કોન્સ્યુલર સેવાઓ વિદેશમાં મુશ્કેલીમાં મુકાયેલા ભારતીયોને સમયસર કાનૂની, નાણાકીય અને વીમા કવચ પૂરું પાડવા માટે કટિબદ્ધ છે.
વૈશ્વિક સ્તરે ભારતની વધતી ધાક
ભારતે તાજેતરમાં યુરોપિયન યુનિયન, બ્રિટન અને ન્યુઝીલેન્ડ જેવા દેશો સાથે મહત્વના કરારો કર્યા છે. આ કરારો હેઠળ ભારતીય શ્રમિકોના સામાજિક રક્ષણ અને ન્યાયી ભરતી પ્રક્રિયા પર ભાર મૂકવામાં આવ્યો છે. મંત્રી સિંહે ઉમેર્યું હતું કે, વિદેશ જતા પહેલા આપવામાં આવતા 'ઓરિએન્ટેશન પ્રોગ્રામ્સ' (Pre-departure Orientation) મુસાફરોને ત્યાંના કાયદા અને પરિસ્થિતિઓથી માહિતગાર કરી વધુ સજ્જ બનાવે છે, જેથી તેઓ કોઈપણ મુશ્કેલી વગર પોતાનું કામ કરી શકે.