ગાંધીનગર : પાકિસ્તાનમાં કથળતી જતી સુરક્ષા પરિસ્થિતિ અને આતંકવાદી હિંસાના સતત તોળાતા જોખમ વચ્ચે યુનાઇટેડ સ્ટેટ્સ (અમેરિકા) દ્વારા એક અત્યંત મોટો અને આકરો રાજદ્વારી નિર્ણય લેવામાં આવ્યો છે. અમેરિકાએ પાકિસ્તાનના અશાંત ગણાતા ખૈબર પખ્તુનખ્વા પ્રાંતના પેશાવર શહેરમાં સ્થિત પોતાના કોન્સ્યુલેટ જનરલ (વાણિજ્ય દૂતાવાસ)ને સત્તાવાર રીતે કાયમ માટે બંધ કરી દીધું છે. યુએસ ડિપાર્ટમેન્ટ ઓફ સ્ટેટ દ્વારા જારી કરાયેલા સત્તાવાર નિવેદનમાં સ્પષ્ટ કરવામાં આવ્યું છે કે, આ પગલું રાજદ્વારી કર્મચારીઓની સુરક્ષા અને કાર્યક્ષમ સંસાધન વ્યવસ્થાપન પ્રત્યેની તેમની પ્રતિબદ્ધતાને આધારે લેવામાં આવ્યું છે. પેશાવરથી ભૌતિક હાજરી હટાવી લીધા બાદ, હવે ખૈબર પખ્તુનખ્વા પ્રાંત માટેની તમામ રાજદ્વારી જવાબદારીઓ ઇસ્લામાબાદમાં આવેલી મુખ્ય અમેરિકી એમ્બેસીના વિશેષ યુનિટને ટ્રાન્સફર કરવામાં આવી છે.

આ નિર્ણય પાછળ પાકિસ્તાનમાં છેલ્લા કેટલાક મહિનાઓથી અમેરિકા વિરુદ્ધ ફાટી નીકળેલો જનઆક્રોશ અને હિંસક વિરોધ પ્રદર્શનો મુખ્ય જવાબદાર હોવાનું માનવામાં આવે છે. અહેવાલો અનુસાર, અમેરિકા-ઇઝરાયેલ દ્વારા કરાયેલા હુમલામાં ઈરાનના સર્વોચ્ચ નેતા આયાતુલ્લાહ અલી ખામેનીના મોત બાદ સમગ્ર પાકિસ્તાનમાં ઉગ્ર દેખાવો શરૂ થયા હતા. કરાચીમાં અમેરિકન કોન્સ્યુલેટ નજીક પ્રદર્શનકારીઓ અને પાકિસ્તાની સુરક્ષા દળો વચ્ચે થયેલી ભયાનક અથડામણમાં ૯ લોકોના મોત નિપજ્યા હતા. ત્યાર બાદ સ્થિતિ વધુ તણાવપૂર્ણ બનતા અમેરિકાએ ઈરાન તરફથી સંભવિત ડ્રોન અને મિસાઈલ હુમલાની આશંકા વચ્ચે કરાચી અને લાહોર કોન્સ્યુલેટમાંથી પણ પોતાના બિન-કટોકટી કર્મચારીઓ અને તેમના પરિવારોને પાકિસ્તાન છોડી દેવાનો કડક આદેશ આપ્યો હતો.

અમેરિકી વિદેશ વિભાગે વધુમાં એક અલગ એડવાઇઝરી જારી કરીને સમગ્ર પાકિસ્તાનમાં આતંકવાદી હિંસાના સતત વધી રહેલા ખતરા અંગે ગંભીર ચિંતા વ્યક્ત કરી છે. ખાસ કરીને બલુચિસ્તાન અને ખૈબર પખ્તુનખ્વા જેવા સરહદી વિસ્તારો તેમજ કરાચી અને રાજધાની ઇસ્લામાબાદ જેવા દેશના મોટા આર્થિક અને વહીવટી મથકો પર હિંસક ઉગ્રવાદી જૂથોના ટાર્ગેટ પર હોવાની ચેતવણી અપાઈ છે. પેશાવર કોન્સ્યુલેટ બંધ થવાથી પાકિસ્તાનની આંતરરાષ્ટ્રીય સ્તરે સુરક્ષા વ્યવસ્થાને લઈને ભારે ફજેતી થઈ છે, જો કે વોશિંગ્ટને સ્પષ્ટ કર્યું છે કે આ નિર્ણયથી પાકિસ્તાન સાથેના તેમના વ્યૂહાત્મક સંબંધોની અગ્રતામાં કોઈ ફેરફાર થશે નહીં અને તેઓ અન્ય માધ્યમો દ્વારા આ ક્ષેત્ર સાથે રાજદ્વારી જોડાણ ચાલુ રાખશે.