રિયાધ, તા. ૦૮: મિડલ ઈસ્ટમાં ચાલી રહેલા ભારે યુદ્ધ અને તણાવ વચ્ચે ઈરાન સમર્થિત યમનના હુતી બળવાખોરોએ સાઉદી અરેબિયા પર એક ભયાનક અને સનસનાટીભર્યો મિસાઈલ તથા ડ્રોન હુમલો કરી દીધો છે. આ ભીષણ હુમલામાં આશરે ૭૩ લોકો ગંભીર રીતે ઘાયલ થયા હોવાના અહેવાલ છે. હુતી બળવાખોરોએ સાઉદીના નાગરિકી વિસ્તારો તેમજ દેશના અત્યંત મહત્વપૂર્ણ આર્થિક સ્થળોને સીધા નિશાન બનાવ્યા છે, જેનાથી સમગ્ર આરબ જગતમાં ભારે ખળભળાટ મચી ગયો છે.

સાઉદી અરેબિયાના ઉર્જા મંત્રાલયે આ હુમલાની પુષ્ટિ કરતાં જણાવ્યું હતું કે, બળવાખોરોએ દેશના દક્ષિણ પ્રાંતમાં આવેલી અબહા (Abha) અને જીઝાન સ્થિત તેલ અને ગેસ ઉત્પાદન સુવિધાઓ પર હુમલો કર્યો છે. સાઉદીની વિશ્વપ્રસિદ્ધ સરકારી ઓઈલ કંપની 'અરામકો' (Aramco) ની ફેક્ટરીઓ, અબહા ઈન્ટરનેશનલ એરપોર્ટ અને કિંગ ખાલિદ એર બેઝ પર ડ્રોન ધડાકા કરવામાં આવ્યા છે. હુતીઓના આ આક્રમક પગલાએ સાઉદી અરેબિયા, પાકિસ્તાન અને તુર્કીયે વચ્ચે થયેલા "મક્કા કરાર" (જેને અવારનવાર 'ઇસ્લામિક નાટો' કહેવામાં આવે છે) સામે મોટો લશ્કરી પડકાર ફેંક્યો છે, જે નિયમ મુજબ કોઈપણ એક દેશ પરના હુમલાને તમામ દેશો પરનો હુમલો ગણે છે.

યમનમાં સાઉદી સમર્થિત અને આંતરરાષ્ટ્રીય સ્તરે માન્યતા પ્રાપ્ત સરકાર તથા હુતીઓ વચ્ચે સૈન્ય સંઘર્ષ ચરમસીમાએ પહોંચ્યો છે ત્યારે જ આ હુમલો કરાયો છે. હુતી બળવાખોરોએ આ હુમલાની સત્તાવાર જવાબદારી સ્વીકારી લીધી છે. ઉલ્લેખનીય છે કે, હુતી બળવાખોરો હાલમાં યમનના મોટાભાગના ઉત્તરીય અને ગીચ વસ્તી ધરાવતા વિસ્તારો પર સત્તા ભોગવી રહ્યા છે. આ ઘટના બાદ સાઉદી અરેબિયા અને યમન સરહદે ભારે તણાવ વ્યાપી ગયો છે અને સાઉદી સેના પણ વળતો પ્રહાર કરવા માટે સંપૂર્ણ સજ્જ થઈ ગઈ છે.