​લંડન: બ્રિટનમાં આવેલ અમેરિકી વાયુસેના દ્વારા ઉપયોગમાં લેવાતા પ્રખ્યાત સૈન્ય મથક 'આરએએફ ફેરફોર્ડ' (RAF Fairford) ના આસપાસના વિસ્તારમાં આજે વહેલી સવારે ભારે સનસનાટી મચી ગઈ છે. વિસ્ફોટક પદાર્થ સંબંધિત ગંભીર ગુનાઓની શંકાના આધારે પોલીસે સ્થળ પરથી કેટલાક પુરુષોની અટકાયત કર્યા બાદ તાત્કાલિક અસરથી સમગ્ર વિસ્તારમાં 'મેજર ઇન્સિડન્ટ' (મોટી કટોકટી) જાહેર કરી દેવામાં આવી છે. આ બનાવને પગલે ગ્લોસ્ટરશાયર પોલીસ, આર્મી બોમ્બ સ્કવોડ અને એક્સપ્લોઝિવ ઓર્ડનન્સ ડિસ્પોઝલ (EOD) ટીમ સહિતના સુરક્ષા દળોએ એરબેઝને ઘેરી લીધું છે અને સમગ્ર પંથકમાં સર્ચ ઓપરેશન હાથ ધર્યું છે.

​મળતી વિગતો અનુસાર, આ ઘટના વહેલી સવારે લગભગ એક વાગ્યાના સુમારે શરૂ થઈ હતી. ઘટનાની ગંભીરતાને ધ્યાનમાં રાખીને સુરક્ષા એજન્સીઓએ એરબેઝની તદ્દન નજીક આવેલા વેલફોર્ડ (Whelford) અને હોરકોટ રોડ વિસ્તારના રહેણાંક મકાનોમાંથી લોકોને તાત્કાલિક સુરક્ષિત સ્થળે ખસેડવાની કામગીરી શરૂ કરી દીધી હતી. પોલીસે ઘરોઘર જઈને સ્થાનિક નાગરિકોને બહાર કાઢ્યા હતા અને તેઓને સુરક્ષા ખાતર નજીકના લેઝર સેન્ટર ખાતે આશ્રય આપવામાં આવ્યો છે. આ સાથે જ સમગ્ર વિસ્તારની નાકાબંધી કરીને તમામ મુખ્ય માર્ગો વાહનવ્યવહાર માટે સંપૂર્ણપણે બંધ કરી દેવાયા છે.

​તપાસ એજન્સીઓના જણાવ્યા મુજબ, બંદૂકની અણીએ હાથ ધરાયેલા આ ખાસ ઓપરેશન દરમિયાન કેટલાક શંકાસ્પદ શખ્સોની ધરપકડ કરવામાં આવી છે. આ શખ્સો પાસેથી મળેલા વાહનોમાં બોમ્બ અથવા વિસ્ફોટક પદાર્થો હોવાની શંકાના આધારે બ્રિટિશ આર્મીની સ્પેશિયલ બોમ્બ ડિસ્પોઝલ સ્ક્વોડ દ્વારા તમામ વાહનોનું બારીકાઈથી ચેકિંગ કરવામાં આવી રહ્યું છે. વહીવટીતંત્ર દ્વારા સુરક્ષા છત્ર વધુ મજબૂત કરવા માટે રોયલ એરફોર્સ, ગ્લોસ્ટરશાયર પોલીસ, વિલ્ટશાયર પોલીસ, થેમ્સ વેલી પોલીસ તેમજ સંરક્ષણ મંત્રાલયની સશસ્ત્ર પોલીસ ટુકડીઓને તૈનાત કરી દેવામાં આવી છે. ઓપરેશન દરમિયાન નેશનલ પોલીસ એર સર્વિસનું હેલિકોપ્ટર પણ લાંબા સમય સુધી એરબેઝ પર ચુસ્ત નિગરાની રાખતું જોવા મળ્યું હતું.

​બ્રિટિશ સુરક્ષા દળોના સત્તાવાર પ્રવક્તાએ આ અંગે માહિતી આપતા જણાવ્યું હતું કે, "ગંભીર પરિસ્થિતિને ધ્યાનમાં રાખીને અગમચેતીના ભાગરૂપે કટોકટી જાહેર કરવામાં આવી છે અને નાગરિકોની સુરક્ષા માટે વિસ્તાર ખાલી કરાવાયો છે. વિસ્ફોટક કાયદા હેઠળ ધરપકડ કરાયેલા આરોપીઓ અને તપાસ આસપાસના વાહનો પર કેન્દ્રિત છે. સમગ્ર ઘટના હાલ સંપૂર્ણપણે નિયંત્રણ હેઠળ છે અને અમારી તમામ સંયુક્ત એજન્સીઓ પૂર્વ-આયોજિત સુરક્ષા પ્લાન મુજબ પરિસ્થિતિને પહોંચી વળી રહી છે."

​ઉલ્લેખનીય છે કે, મધ્યપૂર્વમાં ચાલી રહેલી વૈશ્વિક ખેંચતાણ વચ્ચે બ્રિટનનું આ એરબેઝ અમેરિકી બોમ્બર વિમાનોની ગતિવિધિઓ માટે અત્યંત મહત્વપૂર્ણ અને સંવેદનશીલ માનવામાં આવે છે. તાજેતરમાં જ અહીં સુરક્ષા વધારી દેવામાં આવી હતી અને એરબેઝના દરવાજાઓ પર ભારે મશીનરી ખડકી દેવામાં આવી હતી. આ ઘટનામાં ચોક્કસ કયા પ્રકારનો ખતરો હતો તે અંગે હજુ સુધી એજન્સીઓએ વધુ ખુલાસો કર્યો નથી, પરંતુ બોમ્બ ડિસ્પોઝલ સ્કવોડ અને ઇમરજન્સી સેવાઓ દ્વારા સ્થળ પર સઘન તપાસ ચાલુ રાખવામાં આવી છે.