મુંબઈ : આર્થિક રાજધાની મુંબઈમાં આગામી દિવસોમાં પાણીની ગંભીર અછત સર્જાવાના એંધાણ વર્તાઈ રહ્યા છે, કારણ કે શહેરને પાણી પૂરું પાડતા સાતેય જળાશયોમાં નવેમ્બર મહિનાની શરૂઆતમાં જ છેલ્લા આઠ વર્ષનો સૌથી ઓછો જળસંગ્રહ નોંધાતા તંત્ર દ્વારા શહેરમાં ૧૦ ટકા પાણીકાપ ચાલુ રાખવાનો મોટો નિર્ણય લેવામાં આવ્યો છે.

પ્રાપ્ત વિગતો અનુસાર, બૃહન્મુંબઈ મહાનગરપાલિકાના સત્તાવાર આંકડા મુજબ ૩ નવેમ્બર સુધીમાં તળાવોમાં કુલ ક્ષમતાના માત્ર ૮૪.૩૫ ટકા એટલે કે ૧૨.२० લાખ મિલિયન લિટર પાણી જ બચ્યું છે, જે ગત વર્ષોની સરખામણીએ ચિંતાજનક રીતે ઘણું ઓછું છે.

આ જળસંકટ પાછળ અલ નીનોની સ્થિતિ, ઓક્ટોબર માસમાં સામાન્ય કરતાં વધુ રહેલું તાપમાન અને તળાવોમાં બમણી ઝડપે થયેલું બાષ્પીભવન મુખ્ય કારણો તરીકે સામે આવ્યા છે, જેમાં ખાસ કરીને મોડક સાગર તળાવમાં પાણીનું સ્તર ઘટીને માત્ર ૪૯.૦૨ ટકા જ રહી ગયું છે.

બીએમસીના એડિશનલ કમિશનર અભિજિત બાંગરે જણાવ્યું હતું કે ચોમાસા દરમિયાન વરસાદની ઘટ અને તળાવોમાં નવો જથ્થો ન ઉમેરાવાને કારણે તેમજ શહેરની દૈનિક ૪,૧૦0 મિલિયન લિટર પાણીની જરૂરિયાતને પહોંચી વળવા આ પગલું અનિવાર્ય બન્યું હતું.

હાલની સ્થિતિએ ભાતસા, તાનસા, વિહાર અને તુલસી સહિતના જળાશયોમાંથી સાવચેતીપૂર્વક પાણીનું વિતરણ કરવામાં આવી રહ્યું છે, જેથી આગામી ઉનાળા અને આગામી ચોમાસા સુધી મુંબઈગરાઓને પાણીની કમીનો સામનો ન કરવો પડે.

આગામી સમયમાં જળસંસાધનોની ઉપલબ્ધતા જાળવી રાખવા માટે મનપા દ્વારા પાણીના બિનજરૂરી વપરાશ પર રોક લગાવવાની સાથે-સાથે વિવિધ વિકલ્પો પર ગંભીરતાથી વિચારણા કરવામાં આવી રહી છે.