મુંબઈ, તા. 17  : મેટ્રિમોનિયલ વેબસાઈટ શાદી ડોટ કોમ પર લગ્નની લાલચ આપીને મુંબઈની એક મહિલા ડોક્ટર સાથે 1 કરોડ 42 લાખ રૂપિયાની ઠગાઈ કરવાના કેસમાં મુંબઈની સેશન્સ કોર્ટે આણંદના ત્રણ આરોપીઓની જામીન અરજીઓ ફગાવી દીધી છે. કોર્ટે નોંધ્યું કે આરોપીઓ સામે પ્રથમ દૃષ્ટિએ ગંભીર ગુનો બને છે અને તપાસ હજુ ચાલુ હોવાથી જામીન આપી શકાય નહીં.

ફરિયાદ મુજબ મુંબઈમાં રહેતા 38 વર્ષીય મહિલા ડોક્ટરે શાદી ડોટ કોમ પર પોતાની પ્રોફાઈલ બનાવી હતી. થોડા મહિના પહેલા તેમનો સંપર્ક રોહન મેહતા નામના વ્યક્તિએ કર્યો હતો. રોહને પોતાની ઓળખ કેનેડામાં રહેતા NRI ડોક્ટર તરીકે આપી હતી અને લગ્નનો પ્રસ્તાવ મૂક્યો હતો. થોડા દિવસો સુધી વાતચીત બાદ રોહને મહિલાને જણાવ્યું કે તે ભારતમાં એક મોટી હોસ્પિટલ પ્રોજેક્ટમાં રોકાણ કરવા માંગે છે અને તેમાં પાર્ટનર બનવા માટે મદદ માંગી હતી.

વિશ્વાસમાં લઈને આરોપીએ અલગ અલગ બહાને મહિલા પાસેથી કુલ 1.42 કરોડ રૂપિયા અલગ અલગ બેંક ખાતામાં ટ્રાન્સફર કરાવ્યા હતા. પૈસા લીધા બાદ આરોપીએ સંપર્ક તોડી નાખ્યો હતો. શંકા જતા મહિલાએ મુંબઈ સાયબર પોલીસમાં ફરિયાદ નોંધાવી હતી. તપાસ દરમિયાન પોલીસે આણંદથી ત્રણ આરોપીઓની ધરપકડ કરી હતી. તપાસમાં સામે આવ્યું કે રોહન મેહતાના નામે જે પ્રોફાઈલ હતી તે બોગસ હતી અને આ ટોળકી મેટ્રિમોનિયલ સાઈટ પર નકલી પ્રોફાઈલ બનાવીને ઠગાઈ કરતી હતી.

પોલીસે જણાવ્યું કે આ ગેંગનો મુખ્ય સૂત્રધાર હજુ ફરાર છે અને તેની શોધખોળ ચાલુ છે. પકડાયેલા ત્રણેય આરોપીઓ બેંક ખાતા પૂરા પાડવા અને પૈસા ઉપાડવાનું કામ કરતા હતા. કોર્ટે આરોપીઓની જામીન અરજી ફગાવતા કહ્યું કે આવા ગુનાઓમાં સંડોવાયેલા લોકોને છોડવાથી સમાજમાં ખોટો સંદેશ જશે. મેટ્રિમોનિયલ સાઈટ પર પ્રોફાઈલ બનાવતા પહેલા પૂરતી ખરાઈ કરવા પોલીસે લોકોને અપીલ કરી છે.