વોશિંગ્ટન, તા.10: યુનાઇટેડ સ્ટેટ્સના હોમલેન્ડ સિક્યુરિટી ડિપાર્ટમેન્ટ (DHS) દ્વારા સોશિયલ મીડિયા પર શેર કરવામાં આવેલા એક વિવાદાસ્પદ એઆઈ-જનરેટેડ (AI-generated) પોસ્ટરે સમગ્ર અમેરિકામાં વસતા ભારતીય સમુદાયમાં ભારે રોષ અને આક્રોશની જ્વાળા ભડકાવી દીધી છે. કડક ગેરકાયદેસર ઇમિગ્રેશન નીતિના નામે બહાર પાડવામાં આવેલા આ પોસ્ટરમાં ભારતીય-અમેરિકનો અને ખાસ કરીને શીખ સમુદાયને જાતિવાદી રીતે નિશાન બનાવીને 'સ્વ-દેશનિકાલ' થવા અથવા ગંભીર પરિણામો ભોગવવાની ખુલ્લી ચેતવણી આપવામાં આવી છે.

લોકપ્રિય પાત્રોનો ઉપયોગ કરીને વિવેકહીન નિશાન

ટ્રમ્પ વહીવટીતંત્રના વિવાદિત અભિયાનના ભાગરૂપે DHSના સત્તાવાર X (ટ્વિટર) એકાઉન્ટ પરથી શેર કરાયેલી આ પોસ્ટમાં પ્રખ્યાત 'ટ્રાન્સફોર્મર્સ' ફ્રેન્ચાઇઝના મુખ્ય પાત્ર 'ઓપ્ટિમસ પ્રાઇમ'નો ઉપયોગ કરવામાં આવ્યો છે. પોસ્ટરમાં ઓપ્ટિમસ પ્રાઇમ "મિ. સિંહ" નામના દાઢીવાળા ભારતીય વ્યક્તિને દેશ છોડી દેવા ધમકાવતો જોવા મળે છે. એટલું જ નહીં, કેપ્શનમાં અત્યંત વાંધાજનક ટિપ્પણી કરતા લખવામાં આવ્યું છે કે, "અમારા રસ્તામાંથી દૂર જાઓ, તમને વાહન ચલાવતા નથી આવડતું, મિ. સિંહ."

સમુદાય પર સીધો હુમલો: ભારતીય અને શીખ સંગઠનોનો સખત વિરોધ

અમેરિકામાં "સિંહ" અટક હિન્દુ અને શીખ સમુદાયમાં વ્યાપકપણે વપરાતી હોવાથી, આ પોસ્ટરને ચોક્કસ સમુદાય વિરુદ્ધ સીધી જાતિવાદી ટીકા ગણવામાં આવી રહી છે. હિન્દુ અમેરિકન ફાઉન્ડેશન (HAF) એ આ ઘટનાની સખત શબ્દોમાં નિંદા કરતા જણાવ્યું છે કે "સિંહ" એ હિન્દુ, શીખ અને અમેરિકન છે અને તેઓ ગૌરવપૂર્વક વાહન ચલાવે છે. સંગઠને આ કૃત્યને રાષ્ટ્રવિરોધી અને ભારત વિરોધી ગણાવીને ત્વરિત ઉચ્ચ સ્તરીય તપાસની માંગ કરી છે.

બીજી તરફ, શીખ ગઠબંધન સંગઠને ભારપૂર્વક જણાવ્યું છે કે 9/11ના હુમલાના ૨૫ વર્ષ પછી પણ શીખોને તેમની ઓળખ અને દેખાવના આધારે લક્ષ્ય બનાવવામાં આવી રહ્યા છે. સંગઠને સ્પષ્ટ કર્યું કે "સિંહ" નો અર્થ "સિંહ" (સિંહ જેવો નિર્ભય) થાય છે અને સરકાર ગમે તેટલી નકારાત્મક છબી ઊભી કરવાનો પ્રયાસ કરે, શીખ સમુદાય પોતાની ઓળખ સાથે હંમેશા નિર્ભય રહેશે.

'CBP હોમ પ્રોગ્રામ' અને ટ્રક ડ્રાઇવરો સામે કાર્યવાહી

આ સમગ્ર વિવાદ DHS ના 'CBP હોમ' પ્રોગ્રામ અને ઇમિગ્રન્ટ ટ્રક ડ્રાઇવરો સામે હાથ ધરાયેલી કાર્યવાહી સાથે જોડાયેલો છે. આ પ્રોગ્રામ હેઠળ ગેરકાયદેસર ઇમિગ્રન્ટ્સને સ્વૈચ્છિક રીતે દેશ છોડવા પ્રોત્સાહિત કરવા રૂ. 2.2 લાખ સુધીનું "એક્ઝિટ બોનસ" આપવામાં આવે છે. જોકે, આ યોજનાના પ્રચાર માટે જાતિવાદી ટ્રોલિંગ અને એઆઈ પોસ્ટરનો ઉપયોગ કરવાના સરકારી વલણ સામે હવે સમગ્ર વિશ્વમાં પ્રત્યાઘાતો પડી રહ્યા છે.