નવી દિલ્હી:  મુખ્ય ચૂંટણી કમિશનર  જ્ઞાનેશ કુમારના રાજીનામાની ઉગ્ર માંગણી સાથે વિપક્ષ 'ઇન્ડિયા' ગઠબંધન દ્વારા દિલ્હીમાં ચલાવવામાં આવી રહેલા આંદોલન વચ્ચે કોંગ્રેસના વરિષ્ઠ નેતા અને સાંસદ શશિ થરૂર પણ આ વિરોધ પ્રદર્શનમાં સક્રિય રીતે જોડાયા છે. સોમવારે શશિ થરૂરે રાષ્ટ્રકવિ રામધારી સિંહ 'દિનકર' ની અત્યંત પ્રખ્યાત કવિતા "જનતંત્ર કા જન્મ" ને ટાંકીને સોશિયલ મીડિયા પર સનસનાટી મચાવી દીધી હતી. થરૂરે કવિતાની અમર પંક્તિ "સિંહાસન ખાલી કરો કિ જનતા આતી હૈ..." શેર કરીને સત્તાધીશો સામે આકરા પરચા બતાવ્યા હતા. આ સાથે જ તેમણે રાહુલ ગાંધીના પ્રખ્યાત નિવેદન "આ સરકાર જશે" નો પડઘો પાડતા આ વિરોધને એક મોટો રાજકીય વળાંક આપ્યો છે.

ઉલ્લેખનીય છે કે, ભૂતકાળમાં લોકનાયક જયપ્રકાશ નારાયણે (JP) પણ તત્કાલીન વડાપ્રધાન ઇન્દિરા ગાંધી સામેના ઐતિહાસિક વિરોધ પ્રદર્શન દરમિયાન દિનકરની આ જ કવિતાની પંક્તિઓનો ઉપયોગ કરીને દેશવ્યાપી આંદોલન ઊભું કર્યું હતું. થરૂરની આ પોસ્ટ સત્તાની ગાદી પર બેઠેલા લોકો માટે એક વ્યાપક સંદેશ માનવામાં આવી રહી છે. શનિવારે (૧૦ ઓક્ટોબર) મુખ્ય ચૂંટણી કમિશનરના રાજીનામાની માંગ દરમિયાન વિદ્યાર્થીઓ અને મહિલાઓ પર થયેલી કથિત પોલીસ હિંસાના વિરોધમાં વિપક્ષી નેતાઓ રસ્તા પર ઉતર્યા છે, ત્યારે થરૂરનો આ કાવ્યાત્મક પ્રહાર રાજકીય વર્તુળોમાં ભારે ચર્ચાનો વિષય બન્યો છે.

રાહુલ ગાંધીના નેતૃત્વ હેઠળ કોંગ્રેસ અને વિપક્ષી પક્ષો છેલ્લા એક અઠવાડિયાથી ચૂંટણી પંચ સામે સતત વિરોધ પ્રદર્શનો કરી રહ્યા છે, ત્યારે અત્યાર સુધી શશિ થરૂર આ આંદોલનથી મોટાભાગે દૂર રહ્યા હતા. ભૂતકાળમાં અનેક આંતરરાષ્ટ્રીય અને રાજદ્વારી મુદ્દાઓ પર ભાજપ સરકારના વલણને ટેકો આપનારા અને પૂર્વ રાજદ્વારી રહી ચૂકેલા શશિ થરૂરે અચાનક આંદોલનમાં ઝુકાવીને પ્રહાર કરતા કોંગ્રેસી છાવણીમાં નવો ઉત્સાહ જોવા મળી રહ્યો છે. થરૂરે સ્પષ્ટ કર્યું કે સાચી શક્તિ દેશની જનતાના હાથમાં છે અને વર્તમાન પરિસ્થિતિ લોકશાહીના મૂલ્યો માટે ગંભીર પડકારરૂપ છે.