નવી દિલ્હી: વૈશ્વિક રાજકારણના મંચ પર જ્યારે પાકિસ્તાન અત્યારે અમેરિકા અને ઈરાન વચ્ચે શાંતિદૂત બનવાનો પ્રયાસ કરી રહ્યું છે, ત્યારે ભારતના પૂર્વ રાજદ્વારી અને કોંગ્રેસ સાંસદ શશિ થરૂરે પાકિસ્તાની વડાપ્રધાન શાહબાઝ શરીફની ભારે ખિલ્લી ઉડાવી છે. ઇસ્લામાબાદમાં ચાલી રહેલી શાંતિ મંત્રણાઓ વચ્ચે શાહબાઝ શરીફની એક સોશિયલ મીડિયા પોસ્ટ વાયરલ થઈ હતી, જેમાં એડિટ હિસ્ટ્રીમાં ‘ડ્રાફ્ટ’ દેખાઈ રહ્યો હતો. આ મુદ્દે થરૂરે કટાક્ષ કરતા કહ્યું કે, પાકિસ્તાનનો વોશિંગ્ટન સાથે કેવો સંબંધ છે તે આના પરથી જ સ્પષ્ટ થાય છે.
“શું ટ્વીટ પણ વોશિંગ્ટન લખી આપે છે?”
દિલ્હીમાં પત્રકારો સાથે વાતચીત દરમિયાન શશિ થરૂરે હસતા હસતા કહ્યું કે, “એવા આરોપો છે કે વોશિંગ્ટને પાકિસ્તાની વડાપ્રધાન માટે આ ટ્વીટ તૈયાર કરી હતી. જો આપણે ભારતીય વડાપ્રધાન માટે કંઈ લખીએ, તો શું તેના પર ‘ડ્રાફ્ટ ફોર પીએમ’ એવું લખેલું હોય? આ ભૂલ દર્શાવે છે કે પાકિસ્તાન માત્ર વોશિંગ્ટનના ઈશારે જ કામ કરી રહ્યું છે.” તેમણે ઉમેર્યું કે શરીફની પોસ્ટ અમેરિકી રાષ્ટ્રપતિ ડોનાલ્ડ ટ્રમ્પની પોસ્ટ સાથે આશ્ચર્યજનક સામ્યતા ધરાવતી હતી.
પાકિસ્તાનની મજબૂરી અને ભારતની વ્યૂહરચના
થરૂરે પાકિસ્તાનની મધ્યસ્થી પાછળનું અસલી કારણ સમજાવતા કહ્યું કે, પાકિસ્તાન ઈરાન સાથે 900 કિમીની સરહદ ધરાવે છે અને ત્યાં મોટી શિયા વસ્તી છે. જો યુદ્ધ વધશે તો શરણાર્થીઓનો પહેલો પ્રવાહ પાકિસ્તાનમાં જ આવશે. તેથી મધ્યસ્થી કરવી એ પાકિસ્તાનની મજબૂરી છે, કોઈ કુશળતા નહીં. બીજી તરફ ભારત માટે આ કોઈ સ્પર્ધા નથી. ભારતને એ વાતમાં રસ છે કે ગલ્ફ દેશોમાં રહેતા 1 કરોડ ભારતીયો સુરક્ષિત રહે અને ઉર્જા પુરવઠો (તેલ) ખોરવાય નહીં.
મૌન પણ એક મુત્સદ્દીગીરી છે
કોંગ્રેસના જ કેટલાક નેતાઓએ જ્યારે પાકિસ્તાનની ભૂમિકાને ભારતની વિદેશ નીતિની હાર ગણાવી, ત્યારે થરૂરે પોતાની જ પાર્ટીના સૂરથી અલગ થઈને ભારતનો બચાવ કર્યો હતો. તેમણે કહ્યું કે, “રાજદ્વારી દુનિયામાં ક્યારેક મૌન રહેવું એ પણ સૌથી મોટું યોગદાન હોઈ શકે છે. ભારત પરિણામ ઈચ્છે છે, ભલે મધ્યસ્થી ગમે તે કરતું હોય.” તેમણે સ્પષ્ટ કર્યું કે ભારત આ વિસ્તારમાં એક જવાબદાર હિસ્સેદાર છે અને નિષ્ક્રિય નથી, પરંતુ યોગ્ય સમયે જ પોતાની ભૂમિકા ભજવશે.
ઇસ્લામાબાદમાં હાલમાં અમેરિકા અને ઈરાનના પ્રતિનિધિઓ હાજર છે, પરંતુ હજુ સુધી યુદ્ધ રોકવા માટે કોઈ નક્કર માળખું તૈયાર થઈ શક્યું નથી. થરૂરના આ નિવેદને સોશિયલ મીડિયા પર ફરી એકવાર ભારત-પાક સંબંધો અને રાજદ્વારી મર્યાદાઓ પર નવી ચર્ચા છેડી દીધી છે.