નવી દિલ્હી:રાજધાની દિલ્હીના ભારત મંડપમ ખાતે આયોજિત પ્રતિષ્ઠિત આંતરરાષ્ટ્રીય AI સમિટ દરમિયાન થયેલા ‘શર્ટલેસ’ વિરોધ પ્રદર્શને રાજકીય અને સુરક્ષા વર્તુળોમાં ભારે હલચલ મચાવી દીધી છે. આ ઘટનાના મુખ્ય સૂત્રધાર ગણાતા ભારતીય યુવા કોંગ્રેસના રાષ્ટ્રીય પ્રભારી મનીષ શર્માને દિલ્હીની પટિયાલા હાઉસ કોર્ટે આગોતરા જામીન આપીને મોટી રાહત આપી છે. જોકે, આ જામીન મફતમાં નથી મળ્યા; કોર્ટે 1 લાખ રૂપિયાના વ્યક્તિગત બોન્ડ સાથે અનેક કડક શરતો લાદી છે, જેના કારણે મનીષ શર્મા અત્યારે કાયદાકીય શરતોના ચક્રવ્યૂહમાં ફસાયેલા જોવા મળી રહ્યા છે.

આ કેસની વિગતો મુજબ, જ્યારે વિશ્વના 100થી વધુ દેશોના પ્રતિનિધિઓ AI સમિટમાં હાજર હતા, ત્યારે 12 જેટલા શખ્સોએ હાઈ-સેક્યુરિટી ઝોનમાં ઘૂસીને પોતાના શર્ટ ઉતારી વિરોધ પ્રદર્શન કર્યું હતું. પોલીસ તપાસમાં બહાર આવ્યું છે કે આ સમગ્ર કાવતરાનું આયોજન મનીષ શર્મા દ્વારા એક રેસ્ટોરન્ટમાં થયેલી ગુપ્ત બેઠકો દરમિયાન કરવામાં આવ્યું હતું, જેના સીસીટીવી ફૂટેજ પણ એજન્સીઓ પાસે ઉપલબ્ધ છે. પોલીસે કોર્ટમાં દલીલ કરી હતી કે આ કૃત્ય પાછળનો હેતુ આંતરરાષ્ટ્રીય સ્તરે ભારતની છબી ખરાબ કરવાનો હતો, જેને પગલે ઘટનાસ્થળેથી જ ચાર લોકોની ધરપકડ કરવામાં આવી હતી.

કોર્ટે જામીન આપતી વખતે સ્પષ્ટ કર્યું છે કે મનીષ શર્મા તપાસ અધિકારીની પરવાનગી વિના દેશ છોડી શકશે નહીં અને તેમણે પોતાનો મોબાઈલ નંબર તેમજ સરનામું પોલીસને સોંપવું પડશે. આ ઉપરાંત, તેઓ આ કેસના કોઈપણ સાક્ષીનો સંપર્ક કરી શકશે નહીં કે તપાસને પ્રભાવિત કરી શકશે નહીં. તપાસ એજન્સીઓ અત્યારે મનીષ શર્માની ભૂમિકા અંગે વધુ ઊંડાણપૂર્વક પુરાવા એકત્ર કરી રહી છે, ત્યારે કોર્ટની આ શરતો તપાસ પ્રક્રિયાને નિષ્પક્ષ રાખવા માટે અત્યંત મહત્વની માનવામાં આવી રહી છે. હવે જોવાનું એ રહેશે કે આગામી દિવસોમાં આ વિરોધ પ્રદર્શન પાછળના અન્ય કયા ખુલાસાઓ સામે આવે છે.