​વાશિંગ્ટન/યુટા: વિશ્વભરમાં યુએફઓ (UFO), પેરાનૉર્મલ ગતિવિધિઓ અને રહસ્યમય ઘટનાઓ માટે સૌથી વધુ ચર્ચામાં રહેલા અમેરિકાના યુટા (Utah) રાજ્યના કુખ્યાત 'સ્કિનવૉકર રેન્ચ' (Skinwalker Ranch) વિશે ફરી એકવાર ચોંકાવનારા ખુલાસા સામે આવ્યા છે. તાજેતરમાં જારી કરવામાં આવેલા યુએફઓ ફાઇલ્સ અને રિપોર્ટ્સ મુજબ, આ 512 એકરની વિશાળ જમીન નીચે કોઈ અદભુત અને અજાણી દુનિયા છુપાયેલી હોવાની પ્રબળ શંકા વ્યક્ત કરવામાં આવી રહી છે.

​જમીનની અંદરથી મળી આવી અસામાન્ય ચીજવસ્તુઓ

રેન્ચના વર્તમાન માલિક અને અમીર રિયલ એસ્ટેટ ટાયકૂન બ્રેન્ડન ફુગલે તાજેતરના એક ઈન્ટરવ્યુમાં ખુલાસો કર્યો છે કે, તેમની વિશેષ સંશોધન ટીમ દ્વારા જ્યારે રેન્ચની એક મુખ્ય મેસા (ઊંચા પર્વતીય પ્રદેશ) પર ડ્રિલિંગ કરવામાં આવ્યું, ત્યારે નીચેથી અસામાન્ય વિસંગતતાઓ (anomalies) અને કુદરતી માટી સાથે બિલકુલ મેચ ન થતી વિદેશી કે એન્જિનિયર્ડ સામગ્રીનો કાટમાળ મળી આવ્યો હતો. સંશોધકોના જણાવ્યા અનુસાર, મશીનો અચાનક જ જમીનની અંદર કોઈ સખત અને અજ્ઞાત ધાતુ કે ઑબ્જેક્ટ સાથે અથડાતા હતા, જેણે વૈજ્ઞાનિકોને પણ વિચારતા કરી દીધા છે.

​શું અહીં અન્ય લોકનું 'પોર્ટલ' છે?

સ્થાનિક આદિવાસીઓની પૌરાણિક કથાઓ અને આધુનિક સંશોધકોના મતે, આ વિસ્તારમાં વર્ષોથી અજાણી આકાશમાં ઉડતી તક્તિઓ (UFOs), રહસ્યમય અગાઈના ગોળા અને અદ્રશ્ય શક્તિઓનો અનુભવ થતો આવ્યો છે. ઘણા નિષ્ણાતોનું માનવું છે કે આ જગ્યા આકાશગંગાના કોઈ અજાણ્યા માર્ગ કે 'ઇન્ટરસ્ટેલર હાઇવે' સાથે જોડાયેલી હોઈ શકે છે, જ્યાં સમય અને અવકાશના નિયમો કામ કરતા નથી અને એક પ્રકારનું 'પોર્ટલ' સક્રિય રહે છે.

​દાયકાઓથી ચાલી રહ્યું છે સંશોધન

અગાઉ અમેરિકન અબજોપતિ રોબર્ટ બિગલોવ દ્વારા આ ફાર્મની ખરીદી કરીને ગુપ્ત રીતે સતત નજર રાખવામાં આવી હતી, અને હવે વર્તમાન ટીમ અત્યાધુનિક ટેકનોલોજી, સેન્સર અને રડાર દ્વારા સતત આ રહસ્યો પરથી પડદો ઉઠાવવાનો પ્રયાસ કરી રહી છે. તાજેતરના પેન્ટાગોન યુએફઓ દસ્તાવેજો અને આ ખુલાસાઓએ વૈજ્ઞાનિક જગતમાં ખળભળાટ મચાવી દીધો છે કે શું ખરેખર પૃથ્વી પર કોઈ એવી જગ્યા છે જ્યાં એલિયન દુનિયા સીધી દસ્તક દઈ રહી છે?