મુંબઈ : આઇપીએલ ૨૦૨૬ ના પ્લેઓફ મુકાબલા ૨૬ મેથી શરૂ થઈ રહ્યા છે. લીગ સ્ટેજની ૭૦ મેચો બાદ હવે ટુર્નામેન્ટ અંતિમ પડાવ પર છે. આઇપીએલના નવા વિજેતાનો નિર્ણય ૩૧ મેના રોજ અમદાવાદના નરેન્દ્ર મોદી સ્ટેડિયમમાં થશે. ઇતિહાસ સાક્ષી છે કે મોટાભાગે જે ટીમ ક્વોલિફાયર-૧ જીતે છે, તે જ ટ્રોફી પર કબ્જો જમાવે છે.

આઇપીએલ ૨૦૨૬ માં લીગ સ્ટેજ સમાપ્ત થયા પછી હવે પ્લેઓફના મુકાબલા ૨૬ મે, મંગળવારથી શરૂ થશે. પહેલો ક્વોલિફાયર મુકાબલો રોયલ ચેલેન્જર્સ બેંગલુરુ અને ગુજરાત ટાઇટન્સ વચ્ચે રમાશે.

આઇપીએલના આંકડાઓ પર નજર કરીએ તો મોટેભાગે એવું જોવા મળ્યું છે કે જે ટીમ પહેલી ક્વોલિફાયર મેચ જીતે છે, તે જ વિજેતા બને છે. લીગના ઇતિહાસમાં માત્ર ૪ વખત એવું બન્યું છે જ્યારે કોઈ ટીમ પહેલી ક્વોલિફાયર હાર્યા પછી પણ ચેમ્પિયન બની હોય.

આઇપીએલની અત્યાર સુધી કુલ ૧૮ સીઝન રમાઈ ચૂકી છે અને ૧૯ મી સીઝન સમાપ્તિ તરફ છે. આ ૧૮ સીઝનમાં અત્યાર સુધી ૪ વખત એવું બન્યું છે જ્યારે બીજું ક્વોલિફાયર રમનારી ટીમે ટ્રોફી ઉપાડી હોય. 

સૌથી પહેલા આ કારનામું ચેન્નઈ સુપર કિંગ્સે કર્યું હતું, જ્યારે તેમણે ૨૦૧૦ માં પહેલીવાર આ ટ્રોફી પર કબ્જો જમાવ્યો હતો. આ સિવાય મુંબઈએ બે વખત આ કારનામું કર્યું હતું. તેમણે ૨૦૧૩ અને ૨૦૧૭ માં બીજું ક્વોલિફાયર રમીને ખિતાબ પોતાના નામે કર્યો હતો. આ ઉપરાંત સનરાઇઝર્સ હૈદરાબાદ એકમાત્ર એવી ટીમ છે જે એલિમિનેટર મુકાબલો રમીને ચેમ્પિયન બની છે. હૈદરાબાદે ૨૦૧૬ ના ફાઇનલમાં બેંગલુરુને હરાવ્યું હતું.

આ ૪ સીઝન સિવાય અત્યાર સુધી રમાયેલી અન્ય ૧૪ સીઝનમાં પહેલું ક્વોલિફાયર રમનારી ટીમોએ જ ટ્રોફી ઉપાડી છે. એટલું જ નહીં, ૨૦૧૮ પછી અત્યાર સુધી પહેલું ક્વોલિફાયર રમનારી ટીમે જ ખિતાબ પોતાના નામે કર્યો છે. 

એવામાં ઇતિહાસને જોઈએ તો પૂરી સંભાવના છે કે ક્વોલિફાયર-૧ જીતનારી ટીમ ટ્રોફી પર કબ્જો જમાવી લે. નોંધનીય છે કે ૨૦૧૧ માં આઇપીએલમાં પ્લેઓફનો નિયમ આવ્યો હતો અને તે પહેલા સેમિફાઇનલ મેચો થતી હતી.