મુંબઈ :કોમોડિટી માર્કેટમાં અઠવાડિયાના પહેલા જ દિવસે મોટો ઘટાડો જોવા મળ્યો છે. મલ્ટી કોમોડિટી એક્સચેન્જ પર  સોના અને ચાંદીના રેટ નીચે સરકી ગયા છે. સરકારના આયાત ડ્યુટીના નિર્ણયો બાદ કિંમતોમાં જે રોકેટ ગતિ જોવા મળી હતી, તે હવે શાંત પડી ગઈ છે. બજારના નિષ્ણાતો માની રહ્યા છે કે ચાંદીમાં બનેલો તેજીનો પરપોટો હવે ધીમે-ધીમે ફૂટી રહ્યો છે. આ આર્થિક ફેરફારના લીધે રોકાણકારો નવી રણનીતિ બનાવવા મજબૂર બન્યા છે

સોની બજારમાં રોકાણ કરનારા લોકો માટે સપ્તાહની શરૂઆત આંચકાજનક રહી છે. જે કિંમતી વસ્તુઓ ખરીદવા માટે લોકો પડાપડી કરી રહ્યા હતા, તેના માર્કેટમાં અચાનક એક મોટો મોજું આવ્યું છે. બજારના આ નવા વલણના કારણે સામાન્ય ગ્રાહકોથી લઈને મોટા વેપારીઓ સુધીના તમામ લોકો ગણિત માંડી રહ્યા છે. કિંમતોમાં આવેલો આ આંચકો આખી માર્કેટની દિશા બદલી રહ્યો છે.

આજના કારોબારમાં સૌથી મોટો ફટકો સફેદ ધાતુ એટલે કે ચાંદીના ખરીદદારોને પડ્યો છે. શુક્રવારે બજાર બંધ થતી વખતે 1 કિલો ચાંદીનો ભાવ 2,71,866 રૂપિયા હતો. સોમવારે માર્કેટ ઓપન થતાં જ આ કિંમત સીધી 2,64,949 રૂપિયા પ્રતિ કિલો પર પહોંચી ગઈ હતી. એક જ ટ્રેડિંગ સેશનમાં ચાંદીના ભાવમાં 6,917 રૂપિયાનો તોતિંગ ઘટાડો નોંધાયો છે. આ અચાનક આવેલા કડાકાથી માર્કેટમાં ભારે અફરાતફરી મચી ગઈ છે. 

જાન્યુઆરી મહિનામાં ચાંદીના ભાવે ઇતિહાસ રચીને 4 લાખ રૂપિયાનો આંકડો વટાવ્યો હતો. તે સમયે 1 કિલો ચાંદીનો રેટ 4,57,328 રૂપિયાની ઐતિહાસિક સપાટી પર પહોંચી ગયો હતો. આ સર્વોચ્ચ સ્તરની સરખામણીએ વર્તમાન કિંમત ખૂબ જ નીચે આવી ગઈ છે. હાલના આંકડા મુજબ ચાંદી તેના રેકોર્ડ હાઈ સ્તર કરતાં 1,92,379 રૂપિયા પ્રતિ કિલોગ્રામ સસ્તી મળી રહી છે.

પીળી ધાતુ એટલે કે ગોલ્ડ માર્કેટ માં પણ આજે આવી જ હલચલ જોવા મળી હતી. શુક્રવારે સોનું 1,58,547 રૂપિયા પ્રતિ 10 ગ્રામ પર બંધ થયું હતું. સોમવારે સવારે તે 1,000 રૂપિયાના ઘટાડા સાથે 1,57,547 રૂપિયા પર ખૂલ્યું હતું. જોકે ફ્યુચર્સ ટ્રેડિંગ માં થોડી મિનિટો બાદ નીચલા સ્તરેથી રિકવરી જોવા મળી હતી. આ સુધારાના લીધે સોનામાં વધુ ઘટાડો અટકી ગયો હતો.

જાન્યુઆરી મહિનામાં જ સોનાના ભાવે પણ પહેલીવાર 2 લાખ રૂપિયાની સપાટી ક્રોસ કરી હતી. તે સમયે 24 કેરેટ સોનાનો ભાવ 2,02,984 રૂપિયા પ્રતિ 10 ગ્રામ થઈ ગયો હતો. ત્યાર પછી બજારમાં પ્રોફિટ બુકિંગનો દોર શરૂ થયો હતો. હાલમાં સોનું તેના ઓલ-ટાઇમ હાઈ રેટથી 45,437 રૂપિયા સસ્તું થઈ ગયું છે. આ ઘટાડો સોનાના ઘરેણાં ખરીદવા ઈચ્છતા ગ્રાહકો માટે રાહતના સમાચાર લઈને આવ્યો છે.