કોલકત્તા,તા.૨૧: પશ્ચિમ બંગાળની ભાજપ સરકારે એક મોટો નિર્ણય લીધો છે. હવે બંગાળના તમામ મદરેસામાં વર્ગો શરૂ થાય તે પહેલાં પ્રાર્થના દરમિયાન વંદે માતરમ ગાવાનું ફરજિયાત બનશે. લઘુમતી બાબતો અને મદરેસા શિક્ષણ વિભાગે આ માટે એક આદેશ જારી કર્યો છે. મદરેસાએ હવે જૂના નિયમોને બદલીને આ આદેશનું પાલન કરવું પડશે. આ નવો નિયમ સરકાર દ્વારા સંચાલિત મોડેલ મદરેસાઓ (અંગ્રેજી માધ્‍યમ) થી લઈને તમામ સહાયિત અને બિન-સહાયિત મદરેસાઓ સુધીના તમામ મદરેસાઓ પર સમાન રીતે લાગુ થશે.

મદરેસા શિક્ષણ નિયામક દ્વારા જારી કરાયેલા આદેશમાં જણાવાયું છે કે, અગાઉના તમામ આદેશો અને પ્રક્રિયાઓને રદ કરીને, પશ્ચિમ બંગાળ રાજ્‍યમાં લઘુમતી બાબતો અને મદરેસા શિક્ષણ વિભાગ હેઠળના તમામ મદરેસામાં વર્ગો શરૂ થાય તે પહેલાં પ્રાર્થના સભા દરમિયાન વંદે માતરમ ગાવાનું ફરજિયાત છે, જેમાં સરકારી મોડેલ મદરેસા, સહાયિત મદરેસા, માન્‍ય MSKS, માન્‍ય SSKS અને માન્‍ય બિન-સહાયિત મદરેસાનો સમાવેશ થાય છે.

અગાઉ, ૧૪ મે, ૨૦૨૬ ના રોજ, મુખ્‍યમંત્રી સુવેન્‍દુ અધિકારી સરકારે શાળા શિક્ષણ વિભાગ હેઠળની તમામ સરકારી અને સહાયિત શાળાઓમાં વંદે માતરમ ફરજિયાત બનાવ્‍યું હતું. અધિક મુખ્‍ય સચિવ દ્વારા જારી કરાયેલા જાહેરનામામાં જણાવાયું હતું કે પશ્ચિમ બંગાળ સરકારે તાત્‍કાલિક અસરથી શાળા શિક્ષણ વિભાગ હેઠળની તમામ શાળાઓમાં વર્ગો શરૂ થાય તે પહેલાં પ્રાર્થના સભા દરમિયાન વંદે માતરમ રાષ્ટ્રગીત ગાવાનું ફરજિયાત બનાવ્‍યું છે.

આ નીતિ હવે મદરેસામાં પણ લાગુ કરવામાં આવી છે. તમામ મદરેસા સંચાલકો અને સંસ્‍થાના વડાઓને આ આદેશનું કડક પાલન કરવાનો નિર્દેશ આપવામાં આવ્‍યો છે