કોલકાતા, તા.22: કોલકાતામાં તાજેતરમાં દુર્ગા પૂજા પંડાલ દરમિયાન સર્જાયેલી ભીષણ ભાગદોડ અને દુર્ઘટનાની તપાસ કરી રહેલી સ્પેશિયલ ઇન્વેસ્ટિગેશન ટીમ (SIT) ના વડા તથા નિવૃત્ત ન્યાયાધીશ અનિંદિતા રોય સરસ્વતીએ સ્પષ્ટ કર્યું છે કે રાજ્ય સરકારે રિપોર્ટ સબમિટ કરવા માટે નિર્ધારિત કરેલી ત્રણ મહિનાની સમયમર્યાદા અત્યંત ઓછી અને અપૂરતી છે. તેમ છતાં, તેમની ટીમ નિર્ધારિત સમયમાં તપાસ પૂર્ણ કરવા માટે પૂરી તાકાત લગાવી દેશે.

ગયા ૧૭ ઓક્ટોબરના રોજ ઉત્તર કોલકાતાના વ્યસ્ત ચોરબાગન દુર્ગા પૂજા પંડાલમાં અચાનક સર્જાયેલી ભાગદોડની આ ઘટનામાં ૧૯ નિર્દોષ લોકોએ પોતાના જીવ ગુમાવ્યા હતા અને ૨૫ અન્ય લોકો ગંભીર રીતે ઘાયલ થયા હતા. આ હૃદયદ્રાવક ઘટનાની ગંભીરતાને ધ્યાનમાં રાખીને કોલકાતા હાઈકોર્ટ સાથે પરામર્શ કરીને છ સભ્યોની ઉચ્ચ સ્તરીય એસઆઈટીની રચના કરવામાં આવી છે.

એક સ્થાનિક ન્યૂઝ ચેનલ સાથે વાતચીત કરતા એસઆઈટીના વડાએ જણાવ્યું હતું કે ટૂંક સમયમાં જ તમામ સભ્યોની બેઠક મળીને તપાસની અંતિમ રૂપરેખા તૈયાર કરશે અને હકીકતો જાણવા માટે ઘટનાસ્થળની રૂબરૂ મુલાકાત પણ લેવામાં આવશે. તપાસ ટીમ દ્વારા ઘટનાના ક્રમની ફરીથી સમીક્ષા કરવામાં આવશે કે કેવી રીતે ભીડ અચાનક બેકાબૂ બની અને પ્રવેશ તથા બહાર નીકવાના દરવાજાઓની સ્થિતિએ તેમાં શું ભાગ ભજવ્યો હતો.

આ વ્યાપક તપાસ દરમિયાન એસઆઈટી દ્વારા ઓવરક્રાઉડિંગ (વધુ પડતી ભીડ), ખરાબ હવામાન, અફવાઓ, જાહેર લાઉડસ્પીકર જાહેરાતો, અચાનક ભાગદોડ, વીજળી ગુલ થઈ જવાની અટકળો અથવા કોઈ માળખાકીય ખામીઓ જવાબદાર હતી કે કેમ તે તમામ સંભવિત પાસાઓની ગંભીરતાથી તપાસ કરવામાં આવશે. આ ઉપરાંત, આયોજકો, પોલીસ પ્રશાસન, ખાનગી સુરક્ષા કર્મીઓ, સ્વયંસેવકો અને મેડિકલ ઈમરજન્સી સેવાઓની તૈયારીઓની પણ આકરી સમીક્ષા થશે.

ઘટનાના પુરાવાઓ એકત્ર કરવા માટે તપાસ ટીમ સીસીટીવી (CCTV) ફૂટેજ, મોબાઇલ ફોન ક્લિપ્સ, ફોરેન્સિક રિપોર્ટ્સ, કોલ રેકોર્ડ્સ, કંટ્રોલ રૂમ લોગ્સ અને હોસ્પિટલના મેડિકલ રેકોર્ડ્સની ઝીણવટભરી તપાસ કરશે. નોંધનીય છે કે આ એસઆઈટીમાં નિવૃત્ત ન્યાયાધીશ ઉપરાંત ડિઝાસ્ટર મેનેજમેન્ટ વિભાગના મુખ્ય સચિવ, એસટીએફના ડીજી, પોલીસ મહાનિરીક્ષક અને એનડીઆરએફ (NDRF) ના પ્રતિનિધિઓનો સમાવેશ થાય છે.