રિયાધ, તા. 16: પવિત્ર હજ યાત્રા 2026 પહેલા સાઉદી અરેબિયા સરકારે સુરક્ષા અને ભીડ વ્યવસ્થાપનને ધ્યાનમાં રાખીને અત્યંત કડક વલણ અપનાવ્યું છે. જો તમે સત્તાવાર પરમિટ વગર હજ કરવાની યોજના બનાવી રહ્યા હોવ, તો સાવધાન થઈ જજો! સાઉદી ગૃહ મંત્રાલયે જાહેરાત કરી છે કે ગેરકાયદેસર રીતે યાત્રામાં સામેલ થનાર અથવા મદદ કરનાર વ્યક્તિઓને SR 1,00,000 (આશરે ₹22 લાખથી વધુ) સુધીનો ભારે દંડ ફટકારવામાં આવશે.
ગેરકાયદે એન્ટ્રી પર ₹4.5 લાખનો દંડ
નવા નિયમો મુજબ, જે વ્યક્તિઓ સત્તાવાર હજ પરમિટ અથવા યોગ્ય વિઝા વગર મક્કા કે પવિત્ર સ્થળોએ પ્રવેશવાનો પ્રયાસ કરશે, તેમને SR 20,000 (આશરે ₹4.5 લાખ) નો દંડ કરવામાં આવશે. આ નિયમ 18 એપ્રિલથી જૂનના મધ્ય સુધી અમલમાં રહેશે. સાઉદી સરકારે સ્પષ્ટ કર્યું છે કે માત્ર વિઝિટ વિઝા પર આવીને હજ કરવી એ કાયદેસર ગુનો ગણાશે.
મદદ કરનારા એજન્ટો અને હોટલ માલિકોની ખેર નથી
સાઉદી સરકારે માત્ર યાત્રાળુઓ જ નહીં, પણ તેમને ખોટી રીતે મદદ કરનારાઓ પર પણ શિકંજો કસ્યો છે. જો કોઈ વ્યક્તિ કે એજન્ટ પરમિટ વગરના લોકો માટે પરિવહન (Transport), રહેવાની વ્યવસ્થા (Hotels/Apartments) કે ખોટા વિઝાની અરજી કરશે, તો તેમને SR 1,00,000 સુધીનો દંડ થશે. ગુનેગારોની સંખ્યા જેટલી વધારે હશે, દંડની રકમ તેટલી જ વધતી જશે.
10 વર્ષનો પ્રતિબંધ અને દેશનિકાલ
નિયમોનું ઉલ્લંઘન કરનારા વિદેશી નાગરિકોને માત્ર દંડ ભરીને છુટકારો નહીં મળે. તેમને તાત્કાલિક સાઉદી અરેબિયાથી દેશનિકાલ (Deportation) કરવામાં આવશે અને આગામી 10 વર્ષ માટે રાજ્યમાં પ્રવેશવા પર પ્રતિબંધ લાદવામાં આવશે. વધુમાં, ગેરકાયદેસર પરિવહનમાં વપરાયેલા વાહનોને પણ કોર્ટના આદેશથી જપ્ત કરી લેવામાં આવશે.
કેમ લેવાયો આ કડક નિર્ણય?
દર વર્ષે લાખોની સંખ્યામાં યાત્રાળુઓ હજ માટે ઉમટી પડે છે. અનધિકૃત યાત્રાળુઓને કારણે વ્યવસ્થા ખોરવાય છે અને સુરક્ષા જોખમાય છે. આથી, સાઉદી સરકારે રહેવાસીઓ અને મુલાકાતીઓને કાયદાનું પાલન કરવા અને કોઈપણ ઉલ્લંઘન દેખાય તો તરત જ અધિકારીઓને જાણ કરવા વિનંતી કરી છે.
ટૂંકમાં: પવિત્ર યાત્રાને સુરક્ષિત અને સુવ્યવસ્થિત બનાવવા માટે સાઉદી સરકારનો આ ‘માસ્ટર પ્લાન’ છે. યાત્રાળુઓએ હંમેશા અધિકૃત એજન્સીઓ મારફતે જ અરજી કરવી હિતાવહ છે.