નવી દિલ્હી : પ્રખ્યાત આબોહવા કાર્યકર્તા સોનમ વાંગચુકે શનિવારે વિરોધ પ્રદર્શનોને મંજૂરી ન આપવાની નીતિ સામે કેન્દ્ર સરકાર પર પ્રહારો કરતા ચેતવણી આપી છે. શ્રીલંકા અને બાંગ્લાદેશમાં સર્જાયેલી અશાંતિનો ઉલ્લેખ કરતા તેમણે સ્પષ્ટ કર્યું હતું કે જો લોકશાહીમાં વિરોધ પ્રદર્શનો પર રોક લગાવવામાં આવશે, તો આવી ગંભીર પરિસ્થિતિઓ ઊભી થઈ શકે છે. તેમણે ઉમેર્યું હતું કે વિરોધ પ્રદર્શનો સરકારોને વધુ સારું કામ કરવા માટે પ્રેરિત કરવાનો એક શ્રેષ્ઠ માર્ગ છે.

IPF ફેસ્ટિવલને સંબોધતા વાંગચુકે જણાવ્યું હતું કે વિશ્વભરના દેશોમાં વિરોધ પ્રદર્શનોને ખૂબ સરળતાથી મંજૂરી આપવામાં આવે છે, અને આ પ્રદર્શનો સંસદની બિલકુલ સામે યોજાય છે. બ્રિટન, નોર્વે અને સ્વીડન જેવા દેશોના ઉદાહરણ આપતાં તેમણે દાવો કર્યો હતો કે ત્યાં સંસદની સામેનો વિસ્તાર જ વિરોધ પ્રદર્શનનું મુખ્ય કેન્દ્ર હોય છે. ભારતમાં વિરોધ પ્રદર્શનો સંસદથી ઘણા દૂર યોજવામાં આવે છે અને જ્યારે વિરોધ પ્રદર્શનો ફક્ત જંતર મંતર પર જ યોજાતા હતા, ત્યારે પણ તે સ્થળ સંસદથી ઘણું દૂર હતું.

તેમણે ભારપૂર્વક જણાવ્યું હતું કે વિરોધ પ્રદર્શન માટે કોઈની પરવાનગી લેવાની જરૂર ન હોવી જોઈએ, પરંતુ શહેરમાં તહેવાર કે અન્ય કોઈ મોટો કાર્યક્રમ થઈ રહ્યો છે કે કેમ તે જોવા માટે જ માત્ર પરવાનગીની પ્રક્રિયા હોવી જોઈએ. મુખ્ય ચૂંટણી કમિશનર જ્ઞાનેશ કુમારના રાજીનામાની માંગણી સાથે જંતર-મંતર પર વિરોધ પ્રદર્શનનું આહ્વાન કરનાર કોકરોચ જનતા પાર્ટી (CJP) સામે કેન્દ્ર સરકારે કડક પગલાં લીધા છે તેવા સમયે વાંગચુકનું આ નિવેદન અત્યંત મહત્વપૂર્ણ માનવામાં આવી રહ્યું છે.

અત્રે ઉલ્લેખનીય છે કે, લદ્દાખના પર્યાવરણ અને બંધારણીય અધિકારોની સુરક્ષાને લઈને સોનમ વાંગચુક પોતે પણ અગાઉ દિલ્હીમાં વિરોધ પ્રદર્શન અને પદયાત્રા કરી ચૂક્યા છે. વિપક્ષી દળો દ્વારા પણ વિરોધ પ્રદર્શનો રોકવા બદલ કેન્દ્રની ટીકા કરવામાં આવી રહી છે, ત્યારે વાંગચુકની આ ટિપ્પણી બાદ આગામી દિવસોમાં દેશમાં રાજકીય ગરમાવો વધવાની અને વિરોધ પ્રદર્શનના સ્થળો તથા પરવાનગીના નિયમો અંગે નવી ચર્ચા છેડાવાની પ્રબળ શક્યતા છે.