લેહ, તા.૧૪: લદ્દાખના ભવિષ્ય અને બંધારણીય હકોને લઈને કેન્દ્રીય ગૃહ મંત્રાલય (MHA)ની ઉચ્ચ સ્તરીય કમિટી, લેહ એપેક્સ બોડી (LAB) અને કારગિલ ડેમોક્રેટિક એલાયન્સ (KDA) વચ્ચે દિલ્હીમાં યોજાયેલી મહત્વપૂર્ણ બેઠક અનિર્ણાયક રહેતાં ભારે વિવાદ સર્જાયો છે. લાંબી ચર્ચા-વિચારણા છતાં કોઈ નક્કર પરિણામ ન આવતાં જાણીતા પર્યાવરણવિદ અને સામાજિક કાર્યકર્તા સોનમ વાંગચુકે ઉંડો અસંતોષ અને રોષ વ્યક્ત કર્યો છે. વાંગચુકે સોશિયલ મીડિયા પર વિડિયો જારી કરીને કેન્દ્ર સરકારના વલણને 'વર વગરના વાદળ' સમાન ગણાવી લદ્દાખના અસ્તિત્વ માટે લડત તેજ કરવાનું આહ્વાન કર્યું છે.

પોતાના આંદોલનને વધુ મજબૂત બનાવવા માટે સોનમ વાંગચુકે 'કોકરોચ જનતા પાર્ટી' (CJP) ના સંસ્થાપક અભિજીત દીપકે અને તેમના સમર્થકો પાસે ખુલ્લેઆમ સહયોગ માગ્યો છે. દિલ્હીના જંતર-મંતર પર ભૂતકાળમાં સાથે કરેલા સંઘર્ષને યાદ કરતાં તેમણે CJP ના કાર્યકર્તાઓને લદ્દાખના રક્ષણ માટે ફરી એકવાર એકજૂથ થઈને અવાજ ઉઠાવવા અપીલ કરી છે. આ અપીલના બરાબર એક દિવસ બાદ અભિજીત દીપકેએ સોશિયલ મીડિયા પ્લેટફોર્મ 'એક્સ' (X) પર "Stand with Ladakh!" લખીને વાંગચુકની લડાઈને નૈતિક સમર્થન જાહેર કર્યું છે.

સરકાર પર દબાણ લાવવાના ભાગરૂપે લદ્દાખમાં આગામી ૧૯ થી ૨૪ સપ્ટેમ્બર દરમિયાન પાંચ દિવસીય વિશાળ અને શાંતિપૂર્ણ પદયાત્રા કાઢવાની જાહેરાત કરવામાં આવી છે. વાંગચુકે સ્પષ્ટ શરત મૂકી છે કે જો આ પાંચ દિવસ દરમિયાન સરકાર લદ્દાખના હિતમાં કોઈ સકારાત્મક નિર્ણય લેશે, તો આ પદયાત્રા લદ્દાખના શહીદોને સમર્પિત કરાશે; અન્યથા આ આંદોલન ભવિષ્યમાં વધુ ઉગ્ર જન-આંદોલનનું રૂપ ધારણ કરશે.

ઉલ્લેખનીય છે કે, લદ્દાખના લોકો લાંબા સમયથી ક્ષેત્ર માટે પૂર્ણ કક્ષાની વિધાનસભા (Legislative Assembly), બંધારણીય સુરક્ષા અને પર્યાવરણીય જાળવણી માટે સ્થાનિકોની સહભાગિતાની માંગ કરી રહ્યા છે. જ્યાં સુધી કેન્દ્ર સરકાર સ્થાનિક જનતાની આ ન્યાયિક માંગણીઓ સ્વીકારશે નહીં, ત્યાં સુધી શાંતિપૂર્ણ સંઘર્ષ ચાલુ રાખવા માટે વાંગચુક અને સ્થાનિક સંગઠનો મક્કમ છે.