નવી દિલ્હી : કોંગ્રેસ પક્ષના નેતા અને પૂર્વ અધ્યક્ષ સોનિયા ગાંધીએ મંગળવારે બજારમાં આવેલા તેમના નવા પુસ્તક 'બિલોંગિંગ એ જર્ની ઓફ લવ'માં વડાપ્રધાન નરેન્દ્ર મોદી સાથેના તેમના સંબંધો વિશે ખુલ્લીને વાત કરી છે. તેમણે લખ્યું છે કે નરેન્દ્રભાઈને સત્તામાં એક દાયકાથી વધુ સમય થઈ ગયો હોવા છતાં, બંને વચ્ચે ક્યારેય કોઈ અર્થપૂર્ણ વાતચીત થઈ નથી અને વડાપ્રધાન અવારનવાર તેમની સાથે આંખ મિલાવવાનું ટાળે છે. પીટીઆઈના અહેવાલ મુજબ, સોનિયા ગાંધીએ જણાવ્યું કે તેમની ક્રિયાપ્રતિક્રિયાઓ સામાન્ય રીતે અર્ધ-સત્તાવાર પ્રસંગો પર ઔપચારિક અભિવાદન પૂરતી મર્યાદિત હોય છે, ખાસ કરીને જ્યારે સંસદ સત્રના અંતે નેતાઓ લોકસભા અધ્યક્ષની ચેમ્બરમાં ભેગા થાય છે.

તેમણે યાદ કર્યું કે તેઓ માત્ર પરંપરાગત નમસ્તેનું આદાનપ્રદાન કરે છે પરંતુ ભાગ્યે જ તેની આગળ કોઈ વાતચીત કરે છે. ભૂતકાળના રાજકીય સમયની યાદગીરી તાજી કરતા તેમણે જણાવ્યું કે અગાઉ અલગ-અલગ પક્ષોના નેતાઓ વચ્ચે વૈચારિક મતભેદો હોવા છતાં વ્યક્તિગત સંબંધો ખૂબ જ મૈત્રીપૂર્ણ અને હૂંફાળા રહેતા હતા. સોનિયા ગાંધીએ ઉમેર્યું કે જન્મદિવસ અને નવા વર્ષની ઔપચારિક શુભેચ્છાઓ ઉપરાંત તેમની વચ્ચે ક્યારેય કોઈ ગંભીર ચર્ચા થઈ નથી. જો કે, તેમણે યાદ કર્યું કે જ્યારે તે હોસ્પિટલમાંથી પાછા ફર્યા હતા ત્યારે નરેન્દ્રભાઈએ એકવાર તેમના ખબર-અંતર પૂછ્યા હતા.

સોનિયા ગાંધીએ બંને વચ્ચેના અંતરને વ્યક્તિગત કરતાં વૈચારિક ગણાવ્યું અને કહ્યું કે ભારત વિશે તેમની દ્રષ્ટિ મૂળભૂત રીતે અલગ છે. જ્યાં તેઓ સમાનતા અને સામાજિક ન્યાય પર આધારિત સર્વસમાવેશક અને બિનસાંપ્રદાયિક રાષ્ટ્રની હિમાયત કરે છે, ત્યાં તેમણે કહ્યું કે નરેન્દ્રભાઈનું વિશ્વ દ્રષ્ટિબિંદુ આરએસએસની વિચારધારા દ્વારા ઘડવામાં આવ્યું છે. તેમણે એ પણ સ્વીકાર્યું કે દિલ્હીના વિશેષાધિકૃત રાજકીય ચુનંદા વર્ગ પ્રત્યે નરેન્દ્રભાઈની અસહજતા સાથે તેઓ થોડાં અંશે સહમત હતા, કારણ કે તેમને લાગતું હતું કે આ વર્ગની વાતો ઘણીવાર જમીની વાસ્તવિકતાઓથી જોડાણ વગરની હોય છે.

વડાપ્રધાનની સંસદીય વાચાળતા પર સવાલ ઉઠાવતા સોનિયા ગાંધીએ કહ્યું કે તેમના ભાષણોમાં ઘણીવાર ચૂંટણી રેલીઓનો તીખો અવાજ જોવા મળે છે. તેમણે ભાજપ અને આરએસએસની પણ આકરી ટીકા કરી હતી કે તેઓ વારંવાર પંડિત જવાહરલાલ નેહરુને નિશાન બનાવે છે અને ભારતના પ્રથમ વડાપ્રધાન વિશે ખોટી માહિતી ફેલાવે છે.