<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 18th November 2026

સોનિયા ગાંધીના પુસ્‍તકે મહારાષ્‍ટ્રમાં રાજકારણ ગરમાવ્‍યું: શિવસેનાના નેતાઓએ પુસ્‍તકના પાના ફાડીને કર્યો ઉગ્ર વિરોધ

ઉદ્ધવ ઠાકરે જૂથ અને કોંગ્રેસ સામે સીધા સવાલો ઉઠાવતા રાજકીય ગરમાવો આવ્‍યો વીર સાવરકર પરની કથિત વિવાદાસ્‍પદ ટિપ્‍પણીઓને લઈને શિંદે જુથ આક્રમક

મુંબઈ, તા.૧૮: સોનિયા ગાંધીના તાજેતરમાં ચર્ચામાં આવેલા હાઇ-પ્રોફાઇલ પુસ્‍તકને લઈને મહારાષ્‍ટ્રના રાજકારણમાં ભારે ભૂકંપ આવ્‍યો છે. શિવસેનાના નેતાઓએ એક પત્રકાર પરિષદ યોજીને પુસ્‍તકમાં વીર સાવરકર, આરએસએસ અને ભાજપ વિરુદ્ધ કથિત ખોટી વાર્તાઓ ફેલાવવાનો ઉગ્ર વિરોધ નોંધાવ્‍યો હતો. આ વિરોધ પ્રદર્શન દરમિયાન શિવસેનાના નેતાઓએ ગુસ્‍સામાં આવીને પુસ્‍તકના પાના ફાડી નાખ્‍યા હતા અને પુસ્‍તકના અપમાનનો મુદ્દો ગરમાગરમી સાથે જોરશોરથી ઉઠાવ્‍યો હતો. નેતાઓએ આક્રમક રૂખ અપનાવતા દાવો કર્યો હતો કે આ પુસ્‍તકના પાના નંબર ૨૦૧ અને ૪૪૩ પર ક્રાંતિકારી વીર સાવરકર વિરુદ્ધ અપમાનજનક ટિપ્‍પણીઓ કરવામાં આવી છે, જેને કયારેય સહન કરવામાં નહીં આવે.

આ પત્રકાર પરિષદમાં શિંદે શિવસેનાના નેતાઓએ ખાસ કરીને ઉદ્ધવ ઠાકરે જૂથ અને કોંગ્રેસ પાર્ટીને આડે હાથ લીધા હતા. તેમણે ભૂતકાળની યાદ અપાવતા જણાવ્‍યું કે બાળાસાહેબ ઠાકરેએ સ્‍વતંત્ર વીર સાવરકરના અપમાન સામે મણિશંકર ઐયરના ચિત્ર પર ચંપલથી પ્રહાર કર્યા હતા, અને આજે એ જ કોંગ્રેસ સાથે ઉદ્ધવ ઠાકરે હાથ મિલાવીને બેઠા છે. શિવસેનાના નેતાઓએ ઉદ્ધવ ઠાકરે અને કોંગ્રેસને સીધા પડકાર ફેંકતા સવાલ કર્યો કે, શું તમારામાં સોનિયા ગાંધીના ચિત્ર પર થપ્‍પડ મારવાની હિંમત છે? શું તમે સોનિયા ગાંધી પાસેથી માફી માંગશો? નેતાઓએ આકરા શબ્‍દોમાં પ્રહાર કરતા ઉમેર્યું કે સોનિયા ગાંધીનું આ પુસ્‍તક પ્રેમની યાત્રા નહીં પરંતુ નફરતની યાત્રા છે, કારણ કે તેઓ હંમેશાં હિન્‍દુઓ અને ક્રાંતિકારીઓ પ્રત્‍યે નફરતની ભાવના ધરાવતા રહ્યા છે.

બીજી બાજુ, દિલ્‍હીમાં યોજાયેલા સોનિયા ગાંધીના આ પુસ્‍તક વિમોચન કાર્યક્રમમાં દેશભરમાંથી અનેક દિગ્‍ગજ નેતાઓ અને મહાનુભાવો ઉપસ્‍થિત રહ્યા હતા. આ ભવ્‍ય સમારોહમાં રાહુલ ગાંધી, પ્રિયંકા ગાંધી ઉપરાંત તમિલનાડુના મુખ્‍યમંત્રી એમ.કે. સ્‍ટાલિન, કર્ણાટકના નાયબ મુખ્‍યમંત્રી ડી.કે. શિવકુમાર અને હિમાચલ પ્રદેશના મુખ્‍યમંત્રી સુખવિંદર સિંહ સુખુ સહિતના વરિષ્ઠ રાજકીય નેતાઓ અને સાહિત્‍યકારો હાજર રહ્યા હતા. પહેલીવાર લેખિકા બનેલાં સોનિયા ગાંધીએ પુસ્‍તકને મળેલા અભૂતપૂર્વ પ્રતિભાવ પર ભાવુક થઈને કહ્યું કે તેમને આટલા મોટા સ્‍વાગતની અપેક્ષા નહોતી અને આ સમર્થન તેમના માટે અત્‍યંત લાગણીસભર છે. આમ છતાં, મહારાષ્‍ટ્રના રાજકીય અખાડામાં આ પુસ્‍તકને લઈને આગામી દિવસોમાં વિવાદ વધુ વકરે તેવી પૂરી શકયતા દેખાઈ રહી છે.

(3:42 PM IST)