ચેન્નાઈ: દેશમાં સીમાંકન પ્રક્રિયાને લઈને ચાલી રહેલા વિવાદે હવે ઉગ્ર સ્વરૂપ ધારણ કર્યું છે. તમિલનાડુના મુખ્યમંત્રી એમ.કે. સ્ટાલિને કેન્દ્રની ભાજપ સરકાર સામે આરપારની લડાઈનું રણશિંગું ફૂંકતા ૧૬ એપ્રિલે રાજ્યવ્યાપી કાળા ધ્વજ સાથે વિરોધ પ્રદર્શનની જાહેરાત કરી છે. સ્ટાલિને ગંભીર આરોપ લગાવ્યો છે કે સંસદમાં રજૂ થનારો સીમાંકન સુધારો દક્ષિણના રાજ્યો માટે "ઐતિહાસિક અન્યાય" સમાન છે. તેમણે કેન્દ્રને સીધી ચેતવણી આપતા જણાવ્યું હતું કે જો તમિલનાડુના અવાજને દબાવવામાં આવશે, તો સરકારે તેની "ભારે કિંમત" ચૂકવવી પડશે. ડીએમકેના વડાએ આ લડાઈને માત્ર રાજકીય નહીં, પરંતુ તમિલ પ્રજાના અસ્તિત્વ અને અધિકારોની રક્ષા માટેની જંગ ગણાવી છે.
સીમાંકન મુદ્દે વ્યૂહરચના ઘડવા માટે સ્ટાલિને સાંસદો અને જિલ્લા સચિવોની કટોકટી બેઠક બોલાવી હતી. આ બેઠકમાં તેમણે સ્પષ્ટ કર્યું હતું કે જો ઉત્તરીય રાજ્યોની રાજકીય શક્તિમાં અપ્રમાણસર વધારો કરીને દક્ષિણના રાજ્યોને હાંસિયામાં ધકેલવામાં આવશે, તો દેશમાં ૧૯૫૦ અને ૧૯૬૦ના દાયકા જેવું ઉગ્ર આંદોલન ફરી જોવા મળશે. તેમણે પ્રશ્ન ઉઠાવ્યો હતો કે શું ભારતની પ્રગતિમાં સૌથી વધુ યોગદાન આપવા બદલ દક્ષિણના રાજ્યોને આ સજા આપવામાં આવી રહી છે? આ સંઘર્ષમાં સ્ટાલિને તેલંગાણા, કેરળ અને કર્ણાટક જેવા બિન-ભાજપ શાસિત રાજ્યોનો પણ સાથ માંગ્યો છે અને વિંધ્ય પર્વતમાળાની દક્ષિણમાં રહેતા દરેક નાગરિકને આ "ષડયંત્ર" સામે એકજૂટ થવા અપીલ કરી છે.
રાજકીય નિષ્ણાતો માને છે કે આ વિવાદ આગામી સમયમાં કેન્દ્ર-રાજ્ય સંબંધોમાં મોટી તિરાડ પાડી શકે છે. તેલંગાણાના મુખ્યમંત્રી રેવંત રેડ્ડીએ પણ આ બાબતે પત્ર લખીને બેઠકોની ફાળવણી માટે 'હાઇબ્રિડ મોડેલ'નો પ્રસ્તાવ મૂક્યો છે, જે દક્ષિણના રાજ્યોના હિતોનું રક્ષણ કરી શકે. બીજી તરફ, ડીએમકે દ્વારા ઘર-ઘર પર કાળા ધ્વજ ફરકાવવાના આદેશથી સમગ્ર તમિલનાડુમાં ભારેલા અગ્નિ જેવી સ્થિતિ સર્જાઈ છે. સ્ટાલિને સ્પષ્ટ શબ્દોમાં કહ્યું છે કે દક્ષિણ હવે એક અવાજે બોલશે અને સંઘવાદની સાચી ભાવનાને જાળવી રાખવા માટે કોઈપણ હદ સુધી લડશે. સંસદમાં આ બિલ રજૂ થતાની સાથે જ દેશના રાજકારણમાં મોટા ઉલટફેર થવાની શક્યતા સેવાઈ રહી છે.