મુંબઈ,તા.૨૧: મહારાષ્ટ્રના રાજકારણમાં ફરી એકવાર મોટી ઉથલપાથલ થવાની ચર્ચાએ જોર પકડ્‍યું છે. કોંગ્રેસ છોડીને શિવસેનામાં જોડાયેલાં અને ત્‍યારબાદ ઉદ્ધવ ઠાકરેના જૂથમાં મહત્ત્વની ભૂમિકા ભજવનારાં પ્રિયંકા ચતુર્વેદી હવે ભાજપમાં જોડાશે? આ સવાલ રાજકીય વર્તુળોમાં ચર્ચાનો વિષય બન્‍યો છે. જોકે, પ્રિયંકા ચતુર્વેદી ભાજપમાં જોડાવાનાં હોવાની કોઈ સત્તાવાર પુષ્ટિ થઈ નથી. અગાઉ પણ આવી અટકળો સામે આવી હતી, જેને તેમણે નકારી કાઢી હતી. તેમ છતાં તેમની આગામી રાજકીય સફરને લઈને ચર્ચા ચાલી રહી છે.

પ્રિયંકા ચતુર્વેદી મહારાષ્ટ્રના રાજકારણમાં જાણીતું નામ છે. તેઓ મહારાષ્ટ્રમાંથી રાજ્‍યસભાના સાંસદ રહી ચૂક્‍યાં છે. આ ઉપરાંત શિવસેના (UBT)નાં રાજ્‍યસભામાં ઉપનેતા તરીકે પણ તેમણે જવાબદારી સંભાળી હતી. તેમની રાજકીય સફર કોંગ્રેસથી શરૂ થઈ હતી. કોંગ્રેસમાં તેઓ રાષ્ટ્રીય પ્રવક્‍તા તરીકે કાર્યરત હતાં અને વિવિધ રાજકીય મુદ્દાઓ પર પક્ષનો અવાજ રજૂ કરતાં હતાં.

કોંગ્રેસમાં લાંબા સમય સુધી સક્રિય રહ્યા બાદ પ્રિયંકા ચતુર્વેદીએ વર્ષ ૨૦૧૯માં પક્ષ છોડીને શિવસેનામાં જોડાવાનો નિર્ણય લીધો હતો. ત્‍યારબાદ તેઓ મહારાષ્ટ્રના રાજકારણમાં વધુ સક્રિય બન્‍યાં હતાં. વર્ષ ૨૦૨૦માં તેઓ મહારાષ્ટ્રમાંથી રાજ્‍યસભામાં ચૂંટાયાં હતાં. તેમનો રાજ્‍યસભાનો કાર્યકાળ ૨ એપ્રિલ ૨૦૨૬ના રોજ પૂર્ણ થયો હતો. શિવસેનામાં ભાગલા પડ્‍યા બાદ તેઓ ઉદ્ધવ ઠાકરેના નેતૃત્‍વવાળી શિવસેના (UBT) સાથે જોડાયેલાં રહ્યાં હતાં.

પ્રિયંકા ચતુર્વેદીના ભાજપમાં જોડાવાની અટકળો અગાઉ પણ સામે આવી ચૂકી છે. મે ૨૦૨૬માં આવી ચર્ચાઓ અંગે તેમણે સ્‍પષ્ટતા કરતાં ભાજપમાં જોડાવાની શક્‍યતા નકારી હતી. ત્‍યારબાદ જુલાઈ મહિનામાં આપેલા એક ઇન્‍ટરવ્‍યૂમાં પણ તેમણે પક્ષ બદલવા અંગે ફેલાતી વાતો સામે નારાજગી વ્‍યક્‍ત કરી હતી. તેથી હાલ તેમની ભાજપમાં એન્‍ટ્રી અંગેની ચર્ચાને સત્તાવાર નિર્ણય તરીકે જોવી યોગ્‍ય નથી.

બીજી તરફ તાજેતરમાં શિવસેના (UBT)ના નેતા સંજય રાઉત અને પ્રિયંકા ચતુર્વેદી વચ્‍ચે એક મુદ્દે મતભેદ સામે આવ્‍યા હતા. અલ્‍બાનિયામાં થયેલા વિરોધ પ્રદર્શન અંગે સંજય રાઉતની ટિપ્‍પણી સામે પ્રિયંકા ચતુર્વેદીએ અલગ મત વ્‍યક્‍ત કર્યો હતો. તેમણે લોકશાહી વ્‍યવસ્‍થામાં હિસક રીતે સત્તા પરિવર્તનનું સમર્થન ન કરી શકાય તેવું વલણ રજૂ કર્યું હતું. જોકે, આ મતભેદને તેમના ભાજપમાં જોડાવાના પુરાવા તરીકે ગણી શકાય નહીં.