નવી દિલ્હી, તા.૧૫: દેશની રાજધાની દિલ્હીના ઈન્દિરા ગાંધી ઈન્ટરનેશનલ એરપોર્ટ પર મંગળવારે ભારે અફરાતફરી અને ગરમાગરમ દ્રશ્યો સર્જાયા હતા. સ્પાઈસજેટ એરલાઈન્સની દુબઈ જતી બે મહત્વપૂર્ણ ફ્લાઈટ્સ ૨૪ કલાકથી પણ વધુ સમય સુધી વિલંબિત થતાં આક્રોશે ભરાયેલા મુસાફરોએ એરપોર્ટ ટર્મિનલની અંદર જ જમીન પર બેસીને જોરદાર વિરોધ પ્રદર્શન અને ધરણાં શરૂ કર્યા હતા. સોશિયલ મીડિયા પર વાયરલ થયેલા વિડીયોમાં લાંબા ઇંતેજાર બાદ કંટાળેલા પ્રવાસીઓ ફ્લોર પર બેસીને એરલાઈન સામે વિરોધ નોંધાવતા જોવા મળ્યા હતા. 

મળતી માહિતી મુજબ, સ્પાઈસજેટની પ્રથમ ફ્લાઈટ સોમવારે સવારે ૭:૪૫ વાગ્યે દુબઈ માટે ઉડાન ભરવાની હતી, પરંતુ ૨૪ કલાકથી વધુ સમય વીતી જવા છતાં વિમાન રવાના થઈ શક્યું નહોતું અને ફ્લાઈટ ટ્રેકિંગ પોર્ટલ પર તેને "રદ" દર્શાવવામાં આવી હતી. આવી જ રીતે, સોમવારે સાંજે ૬:૪૫ વાગ્યે રવાના થનારી દુબઈની બીજી ફ્લાઈટને પણ રી-શેડ્યૂલ કરીને મંગળવારે બપોરે ૧૨:૦૦ વાગ્યાનો સમય આપવામાં આવ્યો હતો. કોઈ ચોક્કસ કે સ્પષ્ટ માહિતી ન મળવાને કારણે અટવાયેલા પ્રવાસીઓમાં ભારે રોષ જોવા મળ્યો હતો. મુસાફરોની આ મુશ્કેલ પરિસ્થિતિને જોતાં દિલ્હી એરપોર્ટ સત્તાવાળાઓએ તાત્કાલિક ધોરણે આગળ આવીને અટવાયેલા લોકો માટે ભોજન અને નાસ્તાની સુવિધા પૂરી પાડી હતી. 

બીજી તરફ, આ સમગ્ર હોબાળા અંગે સ્પાઈસજેટના પ્રવક્તાએ સ્પષ્ટતા આપતા જણાવ્યું હતું કે, ટેકનિકલ ચકાસણી અને ઓપરેશનલ કારણોસર એક વિમાનને ગ્રાઉન્ડ (સેવામાંથી દૂર) કરવું પડ્યું હતું, જેના કારણે દિલ્હી-દુબઈ રૂટની ફ્લાઈટ્સ SG 5111 અને SG 5105 માં વિલંબ થયો છે. એરલાઈને દાવો કર્યો છે કે અસરગ્રસ્ત મુસાફરોને તેમના ગંતવ્ય સ્થાને પહોંચાડવા માટે વૈકલ્પિક ફ્લાઈટ્સની ગોઠવણ કરવામાં આવી રહી છે અને મુસાફરોને પડતી અસુવિધા ઓછી કરવા માટે કંપની તમામ પ્રયાસો કરી રહી છે.