તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
નાના કર્મચારીઓને નિશાન બનાવવાનું બંધ કરોઃ મોટા માથાઓ પર કાર્યવાહી કરોઃ રાય
અયોધ્યા રામ મંદિર ભંડોળ વિવાદઃ યુપી કોંગ્રેસ અધ્યક્ષ અજય રાયનો એસઆઈટી તપાસ અને ભાજપ પર આકરો પ્રહારઃ કહ્યું કે યુપી કોંગ્રેસ અધ્યક્ષે સીધો આક્ષેપ કર્યો કે ટ્રસ્ટના ચેરમેન નૃપેન્દ્ર મિશ્રા, ચંપત રાય, ગોપાલ રાવ અને અનિલ મિશ્રા જેવા જવાબદાર લોકો પર મુકદ્દમો દાખલ થવો જોઈએ જેઓ બધો માલ ચંપત કરી ગયા છેઃ જેમણે કમિશન ખાધું છેઃ જેના રેકોર્ડ પણ મોજૂદ છે એસઆઈટીની વિશ્વસનીયતા પર સવાલ, એસઆઈટીના વડા પોતે દાગી અધિકારી છે! સમગ્ર ઉત્તર પ્રદેશના ૭૫ જિલ્લામાં કોંગ્રેસના જબરજસ્ત દેખાવોના પગલે ભારે દબાણ સર્જાતા એફઆઈઆર નોંધાઈ હોવાનો અજય રાયનો દાવો
અયોધ્યાઃ શ્રી રામ જન્મભૂમિ મંદિરમાં દાન અને ભંડોળની કથિત ગેરરીતિ મામલે ઉત્તર પ્રદેશ સરકારે ત્રણ સભ્યોની એસઆઈટીની રચના કરી છે. જોકે યુપી કોંગ્રેસ અધ્યક્ષ અજય રાયે આ તપાસની વિશ્વસનીયતા પર સવાલો ઉઠાવતા આક્ષેપ કર્યો છે કે એસઆઈટીના વડા પોતે દાગી અધિકારી છે. રાયે દાવો કર્યો છે કે કોંગ્રેસના દબાણ બાદ નોંધાયેલી એફઆઈઆરમાં માત્ર નાના કર્મચારીઓને નિશાન બનાવવામાં આવ્યા છે જ્યારે ટ્રસ્ટના ચેરમેન નૃપેન્દ્ર મિશ્રા અને ચંપત રાય જેવા મોટા માથાઓને સરકાર બચાવી રહી છે.
અયોધ્યાના શ્રી રામ જન્મભૂમિ મંદિરમાં ભંડોળ અને દાન અંગે થયેલા કથિત ગેરરીતિઓના આક્ષેપો બાદ શ્રી રામ જન્મભૂમિ તીર્થ ક્ષેત્ર ટ્રસ્ટની વિનંતીથી ઉત્તર પ્રદેશ સરકારે ત્રણ સભ્યોની સ્પેશિયલ ઇન્વેસ્ટિગેશન ટીમ એટલે કે એસઆઈટીની રચના કરી છે. લખનઉના ડિવિઝનલ કમિશનર અને આઈએએસ અધિકારી વિજય વિશ્વાસ પંતને આ એસઆઈટીના વડા બનાવવામાં આવ્યા છે. પરંતુ ઉત્તર પ્રદેશ કોંગ્રેસ અધ્યક્ષ અજય રાયે આ તપાસ સમિતિ અને સરકારના ઇરાદાઓ પર ગંભીર સવાલો ઉઠાવ્યા છે.
અજય રાયે સ્પષ્ટપણે જણાવ્યું છે કે એસઆઈટીની રચનામાં જ એક દાગી અધિકારીને અધ્યક્ષ બનાવવામાં આવ્યા છે. વિજય વિશ્વાસ પંત એ જ અધિકારી છે જે અલાહાબાદની ભાગદોડમાં મુખ્ય વ્યક્તિ હતા. આથી સાબિત થાય છે કે સરકાર જે રીતે ઈચ્છશે તે જ રીતે આ અધિકારી કામ કરશે અને તપાસ નિષ્પક્ષ રહેશે નહીં.
વધુમાં તેમણે જણાવ્યું કે જે એફઆઈઆર દાખલ થઈ છે તે સંપૂર્ણપણે કોંગ્રેસ પાર્ટીના દબાણને આભારી છે. કોંગ્રેસે ઉત્તર પ્રદેશના પંચોતેર જિલ્લાઓમાં સડક પર ઉતરીને વિરોધ પ્રદર્શન કર્યું હતું અને રાજ્યપાલને આવેદનપત્ર પાઠવીને તાત્કાલિક મુકદ્દમો દાખલ કરવાની માંગ કરી હતી. બનારસમાં પણ કોંગ્રેસના શહેર અને જિલ્લા અધ્યક્ષોને રોકવા માટે ડીએમ કાર્યાલયનો ગેટ બંધ કરી દેવામાં આવ્યો હતો. સડક પર ઉતરવાના આ પરિણામ સ્વરૂપ જ આજે એફઆઈઆર નોંધાઈ છે.
કોંગ્રેસ અધ્યક્ષે વર્તમાન તપાસ અને એફઆઈઆર પ્રત્યે સખત અસંતોષ વ્યક્ત કરતા કહ્યું કે તેમાં માત્ર ડ્રાઈવર કે નાના કર્મચારીઓ જેવા ગરીબ લોકોને નિશાન બનાવીને ખતમ કરવામાં આવી રહ્યા છે. સાચા ગુનેગારો અને મોટી માછલીઓ ખુલ્લેઆમ ફરી રહી છે. તેમણે સીધો આક્ષેપ કર્યો કે ટ્રસ્ટના ચેરમેન નૃપેન્દ્ર મિશ્રા ચંપત રાય ગોપાલ રાવ અને અનિલ મિશ્રા જેવા લોકો પર મુકદ્દમો દાખલ થવો જોઈએ જેઓ બધો માલ ચંપત કરી ગયા છે અને જેમણે કમિશન ખાધું છે જેના રેકોર્ડ પણ મોજૂદ છે.
અજય રાયે કેન્દ્ર સરકાર અને પ્રધાનમંત્રી પર પ્રહાર કરતા કહ્યું કે રામ મંદિરમાં થતી કોઈપણ ગરબડી માટે સીધી જવાબદારી ટ્રસ્ટના ચેરમેન નૃપેન્દ્ર મિશ્રાની બને છે.
નૃપેન્દ્ર મિશ્રા પાંચ વર્ષ અને ત્રણ મહિના સુધી પ્રધાનમંત્રીના પ્રધાન સચિવ રહી ચૂક્યા હોવાથી પ્રધાનમંત્રી અને કેન્દ્ર સરકાર તેમને ખુલ્લેઆમ બચાવી રહી છે તેવું સ્પષ્ટ દેખાઈ રહ્યું છે. અંતમાં તેમણે માંગ કરી છે કે છાણમાં અને ગાડીઓમાં પૈસા છુપાવનારા તમામ મોટા માથાઓ વિરુદ્ધ કડક કાર્યવાહી થવી જોઈએ
(3:03 PM IST)
છેલ્લા 8 દિવસમાં સૌથી લોકપ્રિય 
