મુંબઈ, તા.૦૯: ઉંમર એ માત્ર એક આંકડો છે તે વાત કેરળના આલાપ્પુઝા જિલ્લાના મુથુકુલમ ગામના ૯૧ વર્ષીય કોલ્લાક્કાયિલ દેવકી અમ્માએ સાબિત કરી બતાવી છે. ૯૧ વર્ષની વયે જ્યાં લોકો આરામ કરતા હોય છે, ત્યાં તેઓ ૧૯ વર્ષની યુવતી જેવા ઉત્સાહ સાથે પર્યાવરણ સંરક્ષણ માટે કાર્યરત છે. પર્યાવરણમાં અસાધારણ યોગદાન બદલ ભારત સરકારે તેમને 'પદ્મશ્રી' પુરસ્કારથી સન્માનિત કર્યા છે. ૪૪ વર્ષ પહેલાં એક માર્ગ અકસ્માત બાદ એકલતા દૂર કરવા તેમણે ઘર પાછળની પડતર જમીનમાં છોડ વાવવાનું શરૂ કર્યું હતું. ચાર દાયકાની અથાક મહેનતથી તેમણે ૫ એકરની ઉજ્જડ જમીનને 'તપોવનમ' નામના ગાઢ જંગલમાં ફેરવી નાખી છે, જેમાં ૩૦૦૦થી વધુ વૃક્ષો અને દુર્લભ પક્ષીઓ વસે છે. પ્રેમથી લોકો તેમને 'વનમુથસ્સી' (જંગલના દાદી) કહે છે.

અન્ય એક રસપ્રદ કિસ્સો જાપાનની પ્રાચીન સંસ્કૃતિ અને ટેકનોલોજીનો છે. વર્ષ ૨૦૧૫ના ભૂકંપમાં આઓમોરી સ્થિત ૪૦૦ વર્ષ જૂના 'હિરોસાકી કિલ્લા'ના પાયાની દીવાલોને નુકસાન થયું હતું. કિલ્લાને તોડ્યા વિના સમારકામ કરવા માટે 'હિકિયા' પદ્ધતિનો ઉપયોગ કરાયો હતો. ૩૬૦ ટન વજન ધરાવતા આ કિલ્લાને રેલ અને રોલર્સની મદદથી ૧૮૦૦ લોકોએ એકસાથે શક્તિ લગાવીને ૨.૨૨ મીટર (આશરે ૭ ફૂટ ૪ ઇંચ) ખસેડ્યો હતો! આ કામ માટે દેશ-વિદેશમાંથી ૮૦૦૦ લોકો સેવા આપવા પહોંચી ગયા હતા અને માત્ર બે દિવસમાં આ અદ્ભુત કારનામું પૂર્ણ કર્યું હતું.

આ સિવાય પણ દુનિયામાં કેટલીક અનોખી ઘટનાઓ નોંધાયેલી છે. જેમ કે, લંડન ઝૂમાં પ્રાણીઓના સ્વાસ્થ્ય અને ગર્ભધારણની તપાસ માટે ૨૦ હજારથી વધુ પ્રાણીઓનું અનોખી રીતે વજન કરવામાં આવે છે. આ ઝૂમાં સૌથી વજનદાર પ્રાણી ૮૫૦ કિલોનું 'એલિસ' નામનું જિરાફ છે, જ્યારે સૌથી હળવી માત્ર ૫ મિલિગ્રામની 'લીફ કટર એન્ટ' (કીડી) છે. તો બીજી તરફ, પશ્ચિમ આફ્રિકાના કેમરૂન દેશના ૯૩ વર્ષીય રાષ્ટ્રપતિ પોલ બિયા સતત ૫૧ વર્ષથી (પ્રધાનમંત્રી અને રાષ્ટ્રપતિ તરીકે) સત્તા પર ટકી રહેવાનો અનન્ય રાજકીય રેકોર્ડ ધરાવે છે.