ટોક્યો : પૂર્વોત્તર જાપાનમાં રવિવારે સવારે ૭:૨૫ વાગ્યે ૬.૧ની તીવ્રતાનો શક્તિશાળી ભૂકંપ અનુભવાયો હતો. જાપાન હવામાન વિભાગના જણાવ્યા અનુસાર, આ ધરતીકંપનું કેન્દ્રબિંદુ દરિયાકાંઠાથી ૪૦ કિલોમીટરની ઊંડાઈએ નોંધાયું હતું, જેના કારણે હાચિનોહે અને આઓમોરી સહિતના વિસ્તારોમાં ધરા ધ્રૂજી ઉઠી હતી. સદનસીબે, આ કુદરતી આફતમાં હાલ કોઈ જાનહાનિના અહેવાલ નથી અને સુનામીનો ખતરો પણ ટળી ગયો છે.

જાપાન માટે ધરતીકંપ નવી વાત નથી, પરંતુ એક જ અઠવાડિયામાં આ બીજો મોટો આંચકો હોવાથી સ્થાનિક નાગરિકોમાં ભયનો માહોલ છે. તંત્ર દ્વારા સલામતીના ભાગરૂપે એલર્ટ જાહેર કરવામાં આવ્યું છે. ભૂકંપના આંચકા એટલા તીવ્ર હતા કે આસપાસના વિસ્તારોમાં રહેતા લોકો તુરંત સુરક્ષિત સ્થળે દોડી ગયા હતા. સ્થાનિક વહીવટીતંત્ર દ્વારા કોઈ નુકસાન થયું છે કે કેમ તેની તપાસ શરૂ કરી દેવામાં આવી છે.

ભૂકંપને પગલે સુનામીની કોઈ ચેતવણી આપવામાં આવી નથી, જે જાપાનના લોકો માટે મોટી રાહત સમાન છે. ભૂતકાળમાં જાપાન આવા અનેક વિનાશક ધરતીકંપોનો સામનો કરી ચૂક્યું છે, તેથી ત્યાંની બિલ્ડિંગો અને ઈન્ફ્રાસ્ટ્રક્ચર ભૂકંપ પ્રતિરોધક હોવા છતાં, વારંવારના આંચકાઓને કારણે નાગરિકો સતર્ક રહેવા માટે સજ્જ છે.

હાલની સ્થિતિએ જાપાન હવામાન વિભાગ પરિસ્થિતિ પર સતત નજર રાખી રહ્યું છે. આગામી કલાકોમાં આફ્ટર શોક્સની શક્યતાને જોતા વહીવટી તંત્ર દ્વારા લોકોને સાવચેતી રાખવા અને સરકારી સૂચનાઓનું પાલન કરવા અપીલ કરવામાં આવી છે. તંત્ર દ્વારા અત્યાર સુધીના નુકસાનના રિપોર્ટ મેળવવાની કામગીરી ચાલુ છે અને નાગરિકોની સુરક્ષા માટે તમામ પ્રકારની વ્યવસ્થાઓ ગોઠવી દેવામાં આવી છે.