ખાર્તુમ (સુદાન), તા.૨૧: આફ્રિકી દેશ સુદાનના ઉત્તર-પૂર્વીય વિસ્તારમાંથી એક અત્યંત દુઃખદ અને હૃદયદ્રાવક ઘટના સામે આવી છે. રેડ સી (Red Sea) રાજ્યના અતિ અંતરિયાળ ઓની (Onib) વિસ્તારમાં આવેલી સોનાની ખાણ અચાનક ધસી પડતાં મોટો અકસ્માત સર્જાયો હતો. આ ભયાનક હોનારતમાં ઓછામાં ઓછા ૧૧ ખનિજ મજૂરોના ઘટનાસ્થળે જ કરુણ મોત નીપજ્યા છે, જ્યારે ૩૦ થી વધુ લોકો ગંભીર રીતે ઈજાગ્રસ્ત થયા છે. ઘટનાને પગલે સ્થાનિક પ્રશાસન અને તંત્ર દ્વારા કાટમાળ નીચે દબાયેલા અન્ય મજૂરોને સુરક્ષિત બહાર કાઢવા માટે યુદ્ધના ધોરણે રેસ્ક્યુ ઓપરેશન હાથ ધરવામાં આવ્યું છે.

સરકારી કંપની 'સૂડાનીઝ મિનરલ રિસોર્સિસ'ના અધિકારીઓ પાસેથી મળતી વિગતો મુજબ, શનિવારે મોડી રાત્રે ઓની સ્થિત સોનાની ખદાનમાં અચાનક ઉપરી ભાગ કડડભૂસ થઈને ધસી પડ્યો હતો. રવિવાર સાંજ સુધીમાં કાટમાળમાંથી ૧૧ મૃતદેહો બહાર કાઢવામાં આવ્યા હતા અને ૩૦ જેટલા ઘાયલ શ્રમિકોને બચાવીને સારવાર અર્થે નજીકની હોસ્પિટલમાં ખસેડાયા છે. હજુ પણ કેટલાક મજૂરો કાટમાળ નીચે ફસાયેલા હોવાની આશંકા હોવાથી શોધખોળ ચાલી રહી છે.

એક જ અઠવાડિયામાં બીજી મોટી દુર્ઘટના

સુદાનમાં સુવિધાઓ વિના અને ગેરકાયદેસર રીતે ચાલતી સોનાની ખદાનોમાં સુરક્ષાના અભાવે એક જ સપ્તાહમાં આ બીજી મોટી હોનારત સર્જાઈ છે. આ અગાઉ ગત રવિવારે દેશના પશ્ચિમ ભાગમાં પેરામિલેટ્રી 'રેપિડ સપોર્ટ ફોર્સિસ' (RSF) ના નિયંત્રણ હેઠળના વિસ્તારમાં સોનાની ખાણની અનેક સુરંગો ધસી પડતાં ૮૨ થી વધુ લોકોના મોત નીપજ્યા હતા. સુદાનમાં છેલ્લા ત્રણ વર્ષથી ચાલી રહેલા સૈન્ય સંઘર્ષ વચ્ચે આવી અસુરક્ષિત ખાણો મજૂરો માટે કાળમુખી સાબિત થઈ રહી છે.