નવી દિલ્હી:  ભારતી એરટેલના સ્થાપક અને ટેલિકોમ કિંગ ગણાતા સુનીલ ભારતી મિત્તલે એક ઐતિહાસિક જાહેરાત કરીને બિઝનેસ જગતમાં હલચલ મચાવી દીધી છે. ૧૯૯૫માં દિલ્હીની ગલીઓમાંથી શરૂ થયેલી એરટેલ હવે તેના ભવિષ્યના નેતૃત્વ માટે સજ્જ થઈ રહી છે. મિત્તલે સ્પષ્ટ કર્યું છે કે આગામી ૧૦ વર્ષમાં તેઓ કંપનીનું સંપૂર્ણ સંચાલન આગામી પેઢીના હાથમાં સોંપી દેશે. જોકે, આ સંક્રમણ ખૂબ જ આયોજિત હશે, કારણ કે તેમને ૧ ઓક્ટોબર, ૨૦૨૬ થી ફરી પાંચ વર્ષ માટે ચેરમેન તરીકે નિયુક્ત કરવામાં આવ્યા છે. પશ્ચિમ એશિયાના તણાવ અને બદલાતા વૈશ્વિક સમીકરણો વચ્ચે મિત્તલનો આ નિર્ણય કંપનીની સ્થિરતા અને લાંબા ગાળાના વિઝનને દર્શાવે છે.

નાણાકીય મોરચે એરટેલે આ વર્ષે આશ્ચર્યજનક સફળતા હાંસલ કરી છે. આફ્રિકન માર્કેટમાં ૪૦ ટકાના જંગી ઉછાળાને કારણે કંપનીની વાર્ષિક આવક પ્રથમ વખત ₹૨ લાખ કરોડના જાદુઈ આંકડાને વટાવી ગઈ છે. એટલું જ નહીં, ૬૫૦ મિલિયન ગ્રાહકો સાથે એરટેલ હવે વિશ્વની બીજી સૌથી મોટી ટેલિકોમ કંપની બની ગઈ છે. જોકે, સુનીલ મિત્તલે સંકેત આપ્યો છે કે તેઓ વર્તમાન સરેરાશ આવક થી સંતુષ્ટ નથી. હાલમાં પ્રતિ વપરાશકર્તા આવક ₹૨૫૭ છે, જેને વધારવા માટે કંપની આગામી સમયમાં રિચાર્જ પ્લાનની કિંમતોમાં વધારો કરી શકે છે, જેની સીધી અસર ભારતના લાખો મોબાઈલ યુઝર્સના બજેટ પર પડશે.

એરટેલ હવે માત્ર કોલિંગ અને ડેટા પૂરતી મર્યાદિત રહી નથી. કંપનીએ હવે સોવરિન ક્લાઉડ લોન્ચ કરવાની સાથે ફાઈનાન્સ (ધિરાણ) બિઝનેસમાં ઝંપલાવવા માટે RBIની મંજૂરી મેળવી લીધી છે. ભારતીય યુઝર્સનો ડેટા વપરાશ પણ આશ્ચર્યજનક રીતે વધીને દર મહિને સરેરાશ ૩૧.૪ જીબી સુધી પહોંચી ગયો છે. ગોપાલ વિટ્ટલના નેતૃત્વમાં કંપની નવી ટેકનોલોજી અને ડિજિટલ સેવાઓ તરફ ઝડપથી આગળ વધી રહી છે. મિત્તલનું નિવૃત્તિ આયોજન એ વાતની સાબિતી છે કે એરટેલ હવે એક વ્યક્તિગત સંચાલિત કંપની મટીને એક મજબૂત સંસ્થાકીય માળખા તરફ વળી રહી છે, જે આગામી દાયકાઓમાં પણ પોતાનું વર્ચસ્વ જાળવી રાખશે.