નવી દિલ્હી:ટાટા ગ્રુપની માલિકીની એર ઇન્ડિયાએ રવિવારે ઉડ્ડયન ક્ષેત્રે એક મોટું સીમાચિહ્ન હાંસલ કરતા તેના પ્રથમ રેટ્રોફિટેડ બોઇંગ 787 ડ્રીમલાઇનર એરક્રાફ્ટનું ભવ્ય અનાવરણ કર્યું છે. એરલાઇનના ૪૦૦ મિલિયન યુએસ ડોલરના મહત્વાકાંક્ષી આધુનિકીકરણ કાર્યક્રમ અંતર્ગત આ પ્રથમ વિમાન છે જેનું ઈન્ટિરિયર સંપૂર્ણપણે બદલી નાખવામાં આવ્યું છે. આ ફેરફાર સાથે એર ઇન્ડિયાએ સ્પષ્ટ સંકેત આપ્યા છે કે તે હવે વૈશ્વિક સ્તરની ટોચની એરલાઇન્સને ટક્કર આપવા માટે સજ્જ છે. આગામી એક વર્ષમાં કંપની તેના બાકીના ૨૫ બોઇંગ 787 વિમાનોને પણ આ જ રીતે હાઇ-ટેક સુવિધાઓથી સજ્જ કરવાની યોજના ધરાવે છે.

નવીનીકરણ કરાયેલા આ વિમાનમાં સૌથી મોટો ફેરફાર તેની બેઠક વ્યવસ્થામાં જોવા મળ્યો છે. અગાઉના બે-ક્લાસ લેઆઉટને બદલે હવે વિમાનને અત્યાધુનિક થ્રી-ક્લાસ કોન્ફિગરેશનમાં રૂપાંતરિત કરવામાં આવ્યું છે. જેમાં બિઝનેસ અને ઇકોનોમી ક્લાસની સાથે હવે મુસાફરોને 'પ્રીમિયમ ઇકોનોમી'નો નવો વિકલ્પ પણ મળશે. આ સાથે જ તમામ કેબિનમાં નવી જનરેશનની સીટો અને અદ્યતન ઇનફ્લાઇટ એન્ટરટેઇનમેન્ટ (IFE) સિસ્ટમ ઇન્સ્ટોલ કરવામાં આવી છે, જે મુસાફરોને આકાશમાં પ્રવાસ દરમિયાન મનોરંજનનો શ્રેષ્ઠ અનુભવ પૂરો પાડશે. આ નવી ડિઝાઇન જાન્યુઆરી ૨૦૨૬માં લોન્ચ થયેલા બોઇંગ 787-9ના ધોરણોને અનુરૂપ રાખવામાં આવી છે.

એર ઇન્ડિયાએ જણાવ્યું હતું કે આ રેટ્રોફિટિંગ પ્રક્રિયામાં વિમાનના આંતરિક ભાગોને સંપૂર્ણપણે ફરીથી ગોઠવીને તેને નવો લૂક આપવામાં આવ્યો છે. ટાટા ગ્રુપ દ્વારા સંચાલન સંભાળ્યા બાદ એરલાઇન પોતાના જૂના કાફલાને આધુનિક બનાવવા પર સતત ભાર મૂકી રહી છે, જેથી મુસાફરોની સેવામાં કોઈ કમી ન રહે. આ નવા મેકઓવર બાદ એર ઇન્ડિયાના વિમાનો હવે વધુ પ્રીમિયમ અને આરામદાયક બન્યા છે. એરલાઇન ક્ષેત્રના નિષ્ણાતો માની રહ્યા છે કે આ મોટા રોકાણ અને પરિવર્તનથી એર ઇન્ડિયા ફરી એકવાર આંતરરાષ્ટ્રીય સ્તરે ભારતની શાન બનીને ઉભરશે.