નવી દિલ્હી, તા.10: મહારાષ્ટ્રની સંલગ્ન લો કોલેજોમાં વિદ્યાર્થીઓના પ્રવેશ અને બેઠકોના કાપ અંગે ચાલી રહેલા કાનૂની વિવાદમાં દેશની સર્વોચ્ચ અદાલતે મહત્વનો ચુકાદો આપ્યો છે. સુપ્રીમ કોર્ટે મુંબઈ યુનિવર્સિટી દ્વારા વિવિધ લો કોલેજોમાં વિદ્યાર્થીઓની બેઠકોમાં ૫૦ ટકાનો ઘટાડો કરવાના નિર્ણયને પડકારતી અરજીને આખરે ફગાવી દીધી છે અને બોમ્બે હાઈકોર્ટના નિર્ણયને માન્ય રાખ્યો છે. જોકે, અરજદાર પર લાદવામાં આવેલા રૂ. ૧ લાખના દંડના આદેશને સુપ્રીમ કોર્ટે રદ કરીને રાહત આપી છે.

શૈક્ષણિક વર્ષ 2026-27 માટે બેઠકોમાં ૫૦% નો કરાયો હતો ઘટાડો

મુંબઈ યુનિવર્સિટીએ શૈક્ષણિક વર્ષ ૨૦૨૬-૨૭ માટે પોતાની સાથે સંલગ્ન લગભગ ૪૫ લો કોલેજોમાં ૩ વર્ષ અને ૫ વર્ષના એલએલબી (LLB) અભ્યાસક્રમો માટે મંજૂર થયેલી સીટોમાં ૫૦ ટકાનો ઘટાડો કરવાનો નિર્ણય લીધો હતો. આ નિર્ણય સામે 'લોયર્સ ફાઉન્ડેશન' નામના સંગઠને બોમ્બે હાઈકોર્ટમાં અરજી દાખલ કરી હતી. પરંતુ હાઈકોર્ટે જુલાઈ મહિનામાં આ અરજી ફગાવી દઈને અરજદાર પર રૂ. ૧ લાખનો દંડ ફટકાર્યો હતો, જેની સામે સુપ્રીમ કોર્ટમાં અપીલ કરવામાં આવી હતી.

પ્રોક્સી મુકદ્દમા અને ગુપ્ત વિગતો પર હાઈકોર્ટે ઉઠાવ્યા હતા સવાલો

ચીફ જસ્ટિસ સૂર્યકાંત, જસ્ટિસ જોયમલ્યા બાગચી અને જસ્ટિસ વી. મોહનાનીની બનેલી બેન્ચે આ મામલે સુનાવણી કરી હતી. બોમ્બે હાઈકોર્ટે નોંધ્યું હતું કે આ અરજી અસરગ્રસ્ત કોલેજો વતી કરવામાં આવેલો 'પ્રોક્સી મુકદ્દમા' (બીજાના વતી કરાયેલો કેસ) હોય તેવું લાગે છે, જેમાં કેટલીક કોલેજોની ગુપ્ત વિગતો શામેલ હતી. સુપ્રીમ કોર્ટમાં સુનાવણી દરમિયાન અરજદારે ખાતરી આપી હતી કે તેઓ ભવિષ્યમાં આવી કોઈ વ્યર્થ અરજીઓ નહીં કરે. અરજદારની આ ખાતરીને ધ્યાનમાં રાખીને સુપ્રીમ કોર્ટે ઉદાર વલણ અપનાવ્યું હતું અને રૂ. ૧ લાખનો દંડ રદ કરીને વિશેષ રજા અરજી ફગાવી દીધી હતી.