નવી દિલ્હી:  દિલ્હી હિંસાના મુખ્ય કાવતરાના કેસમાં જેલમાં બંધ ઉમર ખાલિદને દેશની સર્વોચ્ચ અદાલત તરફથી ફરી એકવાર નિરાશા સાપડી છે. ફેબ્રુઆરી ૨૦૨૦ માં થયેલા દિલ્હી રમખાણો પાછળ મોટી યોજના ઘડવાના આરોપ હેઠળ ખાલિદ સપ્ટેમ્બર ૨૦૨૦ થી જેલવાસ ભોગવી રહ્યો છે. સુપ્રીમ કોર્ટે આજે તેની 'રિવ્યુ પિટિશન' (સમીક્ષા અરજી) પર સુનાવણી કરતા જણાવ્યું હતું કે, જામીન નકારવાના મૂળ આદેશમાં કોઈ દેખીતી ભૂલ કે ખામી જણાતી નથી, તેથી તેની સમીક્ષા કરવાનો કોઈ કાયદાકીય આધાર રહેતો નથી.

ઉમર ખાલિદ દ્વારા દાખલ કરવામાં આવેલી આ અરજીમાં દલીલ કરવામાં આવી હતી કે જામીન નકારતી વખતે કેટલાક તથ્યોની અવગણના કરવામાં આવી છે. જોકે, સુપ્રીમ કોર્ટની બેન્ચે આ દલીલોને ગ્રાહ્ય રાખી ન હતી અને અગાઉના ચુકાદાને યથાવત રાખ્યો હતો. ઉલ્લેખનીય છે કે, ખાલિદ પર UAPA (અનલોફુલ એક્ટિવિટીઝ પ્રિવેન્શન એક્ટ) જેવી ગંભીર કલમો હેઠળ કેસ નોંધાયેલ છે, જે અંતર્ગત જામીન મેળવવા અત્યંત મુશ્કેલ હોય છે. આ નિર્ણયથી હવે ખાલિદના લાંબા સમય સુધી જેલમાં રહેવાની શક્યતા વધુ પ્રબળ બની છે.

આ નિર્ણય દિલ્હી પોલીસ અને તપાસ એજન્સીઓ માટે મોટી જીત સમાન છે, જેઓ દાવો કરી રહ્યા છે કે ૨૦૨૦ ના રમખાણો એ પૂર્વ-આયોજિત કાવતરું હતું. બીજી તરફ, માનવ અધિકાર કાર્યકર્તાઓ અને ખાલિદના સમર્થકો આ નિર્ણયને અભિવ્યક્તિની આઝાદી પરના પ્રહાર તરીકે જોઈ રહ્યા છે. સુપ્રીમ કોર્ટની આ મહોર બાદ હવે ટ્રાયલ કોર્ટમાં કેસની ગતિ કેવી રહે છે તેના પર સૌની નજર રહેશે, કારણ કે જામીન માટેના લગભગ તમામ કાનૂની રસ્તાઓ અત્યારે બંધ દેખાઈ રહ્યા છે.